حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے 21 رمضان المبارک روز شہادت أمیرالمؤمنین حضرت علی علیہ السلام کی مناسبت سے جاری اپنے پیغام میں کہا: حضرت علی ابن ابیطالب علیہما السلام کی شہادت رحلت پیغمبر صلی اللہ علیہ وآلہ وسلم کے بعد تاریخ کا سانحۂ کبریٰ ہے۔

انہوں نے کہا: 19 رمضان المبارک ابن ملجم کی ضرب کے بعد آسمان و زمین کے درمیان یہ صدا بلند ہوئی '' تھدمت واللہ أركان الھدی'' خدا کی قسم ہدایت کے ستون گر گئے۔

علامہ سید ساجد نقوی نے کہا: اس واقعہ سے ہمیں یہ سبق ملتا ہے کہ مقدس مشن کیلئے جدوجہد جاری رہنا چاہئے اگرچہ اس راستے میں جان کی قربانی بھی دینا پڑے۔ اس کے ساتھ ہمیں اس طرف بھی توجہ دینی چاہئے کہ شہید ہونے والی شخصیت کا مشن کیا تھا تاکہ اس کے زندہ رکھنے کی جدوجہد کی جائے۔

انہوں نے کہا: رسول اکرم صلی اللہ علیہ وآلہ وسلم نے فرمایا تھا کہ اے علی! میں نے تنزیل پر جنگ کی ہے آپ تحویل پر جنگ کریں گے۔ حضرت علی علیہ السلام کا مشن قرآنی تعلیمات کی تحویل و تشریح اور ہر سطح پر عادلانہ نظام کا نفاذ تھا۔

علامہ ساجد نقوی نے مزید کہا: پاکستان کے مسائل کا حل بھی شفاف، منصفانہ اور عادلانہ نظام حکومت میں مضمر ہے جس میں أمیرالمؤمنین علیہ السلام کے مثالی دور کے اصولوں سے استفادہ کرتے ہوئے ظلم کا نام و نشان مٹایا جائے، ناانصافی اور تجاوز کا خاتمہ کیا جائے، تمام شہریوں کو ان کے بنیادی حقوق دستیاب ہوں، طبقاتی تقسیم اور تفریق کا خاتمہ کیا جائے، اتحاد و وحدت اور اخوت و رواداری کا عملی مظاہرہ ہو، انتہا پسندی، فرقہ پرستی، جنونیت اور فرقہ وارانہ منافرت کا وجود ہی باقی نہ ہو، امن و خوشحالی کا دور دورہ ہو، معاشی نظام قابل تقلید ہو اور معاشرتی سطح امر بالمعروف اور نہی عن المنکر کے ذریعہ اتنی بلند ہو جائے کہ دنیا کے دوسرے معاشرے اس کی پیروی کرنے کو اپنے لئے اعزاز سمجھیں۔