حوزہ نیوز ایجنسی کی رپورٹ کے مطابق، یمنی مسلح افواج کے ترجمان بریگیڈیئر جنرل یحییٰ سریع نے اعلان کیا ہے کہ یمن کی فضائیہ نے دو امریکی ایئرکرافٹ کیریئرز اور اسرائیل کے دو اہم مقامات کو کامیابی سے نشانہ بنایا۔ انہوں نے کہا کہ یہ حملے فلسطینی عوام کے ساتھ یکجہتی میں کیے گئے ہیں۔
ترجمان کے مطابق، یمنی مسلح افواج نے "یافا" اور "صماد 1" ڈرونز کے ذریعے مقبوضہ فلسطین کے شہر عسقلان اور بندر ایلات پر حملہ کیا۔ انہوں نے یہ بھی بتایا کہ امریکی فضائی حملوں کے جواب میں یمنی فوج نے شمالی بحر احمر میں امریکی ایئرکرافٹ کیریئر "ٹرومین" کو دو کروز میزائلوں اور دو ڈرونز سے نشانہ بنایا، جبکہ بحیرہ مکران میں ایئرکرافٹ کیریئر "وینسن" کو تین کروز میزائلوں اور چار ڈرونز سے ٹارگٹ کیا گیا۔
یحییٰ سریع نے زور دے کر کہا کہ یمنی افواج کے تمام حملے کامیابی سے ہم کنار ہوئے ہیں۔ انہوں نے خبردار کیا کہ یمن اپنے عسکری آپریشنز جاری رکھے گا اور امریکی حملے انہیں روک نہیں پائیں گے۔ انہوں نے مزید کہا کہ آنے والے دنوں میں یمنی افواج مقبوضہ فلسطین کے اندر مزید حملے کر سکتی ہیں۔
اس حملے کے بعد خطے میں کشیدگی میں اضافہ ہوا ہے، جبکہ یمنی فوج کا کہنا ہے کہ وہ فلسطین کی حمایت میں اپنی کارروائیوں کو تیز کر دے گی۔ امریکہ اور اسرائیل کی طرف سے ابھی تک کوئی سرکاری ردعمل سامنے نہیں آیا ہے۔
آپ کا تبصرہ