حوزہ نیوز ایجنسی کی رپورٹ کے مطابق، خوزستان میں عتبات عالیات کی تعمیر نو کے سربراہ، حجت الاسلام موسوی نے اعلان کیا ہے کہ اس سال اربعین حسینی کے موقع پر صوبہ خوزستان مکمل آمادگی کے ساتھ زائرین کی خدمت کے لیے تیار ہے۔ ان کے مطابق شلمچہ اور چذابه کی سرحدوں پر مجموعی طور پر ۷۰۰ مواکب مستقر ہوں گے جو اعلیٰ سطحی خدمات فراہم کریں گے۔
انہوں نے اہواز میں موکب داروں کی ایک اہم نشست سے خطاب کرتے ہوئے کہا: "گزشتہ سالوں کے تجربات اور خصوصی تربیتی پروگراموں کی بنیاد پر، خوزستان کی آمادگی میں نمایاں اضافہ ہوا ہے اور اس بار زائرین کی میزبانی کے معیار میں بھی بہتری آئے گی۔"
حجت الاسلام موسوی نے خواتین کے لیے مخصوص خدمات پر روشنی ڈالتے ہوئے کہا: "اس سال ۵۰ سے زائد موکب خواتین کے لیے مخصوص ہوں گے اور سرحدی ٹرمینلز پر خواتین زائرین کے لیے محفوظ اور مناسب ماحول فراہم کیا گیا ہے۔"
انہوں نے خوزستان کے موسمی حالات کی طرف اشارہ کرتے ہوئے بتایا کہ ٹھنڈے پانی اور برف کی فراہمی کو اولین ترجیحات میں شامل کیا گیا ہے تاکہ گرمی سے ممکنہ طور پر متاثر ہونے والے زائرین کو بچایا جا سکے۔
غذائی انتظامات کے حوالے سے انہوں نے کہا کہ: "موکبوں میں روزانہ تین وقت کا گرم کھانا فراہم کرنے کی مکمل تیاری ہے۔"
انہوں نے مزید کہا کہ سرحدی ٹرمینلز پر روحانی و دینی ماحول برقرار رکھنے کے لیے مختلف معنوی پروگرام بھی ترتیب دیے گئے ہیں، جن میں باجماعت نماز، زیارت عاشورا، اور دعائے ندبہ کی نشستیں شامل ہوں گی۔
حجت الاسلام موسوی کے مطابق: "چذابه بارڈر پر ۳۰۰ اور شلمچہ پر ۴۰۰ موکب تعینات ہوں گے، جن میں سے تقریباً ۸۵ فیصد حسینیہ کی شکل میں مستقل سہولتوں سے آراستہ ہیں اور یہ موکب پانچ دن تک سرحدوں پر خدمات انجام دیں گے۔"
انہوں نے بتایا کہ: "خوزستان سے ۹۰ موکب عراق بھی روانہ کیے جائیں گے تاکہ ایرانی اور غیر ایرانی زائرین کی خدمت وہاں بھی فراہم کی جا سکے۔"
انہوں نے آخر میں کہا کہ: "عوام، خیرین اور حکومتی ادارے یکجہتی اور تعاون کے ساتھ ایک پُر شکوہ اور روحانیت سے بھرپور اربعین کی تیاریوں میں سرگرم ہیں۔"
آپ کا تبصرہ