حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے 29 ذی القعدہ، نویں امام حضرت محمد تقی علیہ السلام کے یوم شہادت کے موقع پر جاری اپنے پیغام میں کہا: آپ علیہ السلام کو اپنے اجداد اور سابقہ آئمہ کے مشن اور تعلیمات کو اگرچہ مختصر عرصے کے لیے آگے بڑھانے کا موقع ملالیکن یہ قلیل مدت بھی تاریخ میں انمٹ نقوش رقم کر گئی اور ہر قسم کے سنگین حالات کے باوجود فریضۂ امامت انتہائی ذمہ داری، حکمت عملی اور بصیرت کے ساتھ انجام دی۔ا جس کے طفیل آج دنیا امامت کے فیوض و برکات سے گذشتہ کئی صدیوں سے فیض یاب ہورہی ہے۔
انہوں نے کہا: امام علیہ السلام کا یہ فرمانا کہ "کلام کی زینت فصاحت، ایمان کی عدالت، عبادت کی سکونِ قلب، علم کی تواضع، عقل کی ادب، حلم کی کشادہ دلی، خوف خدا کی گریہ طویل اور نفس کی زینت ریاضت ہے"۔ درحقیقت عالم بشریت کے لئے یہی ابدی رہنما اصول ہیں۔
علامہ ساجد نقوی نے کہا: حضرت امام محمد تقی الجواد علیہ السلام نے جہاں امت مسلمہ کو قرآن کے الہی احکامات، رسول اکرم صلی اللہ علیہ وآلہ وسلم کی سیرت طیبہ اور آئمہ معصومین علیہم السلام کے فرامین مقدسہ کی طرف متوجہ رکھا وہاں ہر میدان اور ہر مرحلے میں وارث نبیؐ ہونے کے ناطے امت کی رہنمائی فرمائی۔
انہوں نے مزید کہا: امام علیہ السلام کی یہ رہنمائی صرف اپنے حلقۂ ارادت تک نہیں بلکہ عام مسلمان سے لے کر اس وقت کے حکمرانوں تک سب کے لیے یکساں اور برابر تھی۔ یہی وجہ ہے کہ آپ نے اپنے آباء کی طرح امر بالمعروف اور نہی عن المنکر کا نبوی فریضہ انجام دیااور اس راستے میں شدید مشکلات برداشت کیں۔آپ کے والد گرامی امام رضا علیہ السلام مخالفین کی طعنہ و تشنیع کے جواب میں فرماتے "اولاد کا ہونا خالق کائنات کے امر سے ہے عنقریب میرا رب مجھے صاحب اولاد کرے گا اور ایک ایسے فرزند سے نوازے گا جو سلسلۂ امامت کا حقیقی وارث ہو گا اور مخلوق خدا کی ہدایت و رہنمائی کرے گا"۔
علامہ ساجد نقوی نے کہا: امام محمد تقی علیہ السلام نے امتِ مسلمہ کو تا قیامت رہبری و رہنمائی کا سامان بہم پہنچانے کے لیے جس انداز سے حکمت عملی ترتیب دی اور جس طرح حکمرانوں اور دین دشمن طبقات کی سازشوں کا مقابلہ فرمایا اس کی مثال نہیں ملتی۔
قائد ملت جعفریہ پاکستان نے اپنے پیغام میں امت ِمسلمہ پر زور دیا کہ وہ حضرت امام محمد تقی علیہ السلام کی سیرتِ اقدس کا مطالعہ کر کے اس پر حقیقی معنوں میں عمل پیرا ہونے کی جدوجہد کریں تاکہ قیامت تک مکمل استقامت اور واضح اور روشن راستے کے ذریعہ عمل کیا جا سکے اور آخرت کی فلاح حاصل کی جا سکے۔
آپ کا تبصرہ