حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے صدر و وزیراعظم پاکستان سمیت مختلف اعلی حکومتی شخصیات کو لکھے گئے خطوط میں ارباب اختیار سے تقاضا کیا ہے کہ وہ محرم الحرام میں مجالس ، محافل اور جلوس ہائے عزاکے انعقاد کو بلا رکاوٹ آزادی کے ساتھ بنانے کے اقدامات جاری کریں۔
انہوں نے کہا: محرم و صفر المظفر کے ایام لوڈ شیڈنگ فری ایام بھی قرار دئیے جائیں تاکہ نہ صرف عقیدت مند ان شہدائے کربلا کو بھر پور انداز میں خراج عقیدت پیش کر سکیں بلکہ دہشت گردی و تخریب کاری کو ناکام بنانے میں یہ عمل معاون ثابت ہوسکے۔
قائد ملت جعفریہ پاکستان نے ان خطوط کے ذریعہ آمدہ ماہ مقدس محرم الحرام 1447ھ و صفر المظفر کے ا ہم امور بارے متوجہ کرتے ہوئے کہا: پوری دنیا ،عالم اسلام کی طرح پاکستان میں بھی تمام مسلمانوں سمیت دیگر مذاہب کے لوگ بلا تفریق مذہب و مسلک امام انسانیت ،نواسہ رسول (ص) اور ان کے رفقاء کو اپنے اپنے انداز میں گلہائے عقیدت پیش کرتے ہیں اوران کی یاد مناتے ہیں، اس سلسلے میں مختلف انداز میں مجالس، محافل، جلوس ہائے عزا کا انعقاد ملک کے طول وعرض میں ہوتاہے۔
انہوں نے کہا: مجالس ، محافل ، جلوس ہائے عزا کے انعقاد کی بجا آوری یقینی بنائی جائے،یکم محرم تا 10محرم الحرام میں امام عالی مقام ،شہدائے کربلا اور فلسفہ کربلا کے حوالے سے الیکٹرانک میڈیا پر خصوصی پروگرامز اور پرنٹ میڈیا پر خصوصی کالمز ، مضامین اور خصوصی ضمیمے(سپیشل ایڈیشنز)کی سابقہ روایات کو برقرار رکھا جائے اور محدودیت سے گریز کیاجائے۔
علامہ سید ساجد علی نقوی نے کہا: ان ایام میں بجلی کے ترسیلی نظام کو یقینی و موثر بنایا جائے تاکہ ایک طرف عقیدت مندان شہدائے کربلا کو بھرپور انداز میں جہاں خراج تحسین پیش کر سکیں وہیں دہشتگردوں اور تخریب کاروں کے مذموم مقاصد کو بھی ناکام بنانے میں یہ عمل معاون ثابت ہو سکے۔
آپ کا تبصرہ