حوزہ نیوز ایجنسی کی رپورٹ کے مطابق، حزب الله لبنان کے سیکرٹری جنرل حجت الاسلام شیخ نعیم قاسم نے ایک پیغام میں بیروت میں منعقدہ عظیم اور وسیع اجتماع کو سراہتے ہوئے کہا ہے کہ یہ اجتماع پاکیزگی، ایمان اور مزاحمت کا عظیم الشان منظر تھا جس نے حامیوں کو خوش کردیا اور مخالفین کو سیخ پا کردیا۔
واضح رہے یہ اجتماع بیروت کے اسپورٹس کمپلیکس میں شہید سید حسن نصرالله کی پہلی برسی کے ایام میں منعقد ہوا تھا اور تقریباً 80 ہزار سے زائد نوجوان اور جوانوں نے شرکت کی تھی۔
حجت الاسلام شیخ نعیم قاسم نے اجتماع کے شرکاء خاص طور پر جوانوں اور اُن کے اہلِ خانہ کی تعریف کرتے ہوئے کہا کہ اس شرکت سے سید مقاومت کی نسل میں ایک نئی طاقت کا اضافہ ہوا ہے۔
انہوں نے شرکاء کی ہزاروں کی تعداد کو طاقت اور امید کی علامت قرار دیا اور کہا کہ اُنہوں نے مستقبل کی جانب بڑھنے کا پیغام دیا۔
حزبِ الله لبنان کے سربراہ نے تنظیم کو نوجوانوں کی تربیت کا مثالی نمونہ قرار دیا اور کہا کہ حزب الله نوجوانوں کی قوت کے ساتھ فتح حاصل کرے گی؛ یہ فتح ان تمام لوگوں تک پہنچے گی جو اپنی سرزمین کی آزادی اور انسانیت کے مفاد میں ہیں۔
شیخ نعیم قاسم نے جوانوں کو مخاطب کرتے ہوئے کہا کہ ہم، آپ کے ہوتے ہوئے صیہونی بربریت اور امریکی سامراج کے سامنے کبھی شکست تسلیم نہیں کریں گے۔
انہوں نے مزید کہا کہ لبنان کی زمین شہداء کے خون سے سیراب ہوئی ہے، اس لیے لبنان آزاد، باعزّت اور خودمختار رہنے کا عہد جاری رکھے گا۔
حزب الله لبنان کے سربراہ کی جانب سے جاری اس پیغام میں یہ بھی کہا گیا ہے کہ فلسطین اور قدس ان کا دائمی راستہ اور رہنمائی کا مرکز ہیں اور وہ خطے و انسانیت کی خاطر اسی سمت میں کام جاری رکھیں گے۔
آخر میں انہوں نے کہا کہ ہر چیلنج کا مقابلہ کیا جائے گا چاہے بڑی سے بڑی قربانی ہی کیوں نہ دینی پڑے اور الله کے حکم سے حزب الله کا پرچم بلند و بالا رہے گا۔
آپ کا تبصرہ