حوزہ نیوز ایجنسی کی رپورٹ کے مطابق، انقلاب اسلامی ایران کی کامیابی کی سالگرہ کے موقع پر یومِ اللہ 22 بہمن کی مناسبت سے پورے ملک میں شاندار ریلیاں نکالی گئیں۔ زمینی اندازوں کے مطابق ایران کے 1400 شہروں، اضلاع اور قصبوں میں منعقد ہونے والی ان ریلیوں میں مجموعی طور پر تقریباً 26 ملین افراد نے شرکت کی۔
رپورٹس کے مطابق مجموعی شرکت 23 سے 26 ملین کے درمیان رہی، جبکہ یہ اعداد و شمار ملک کے تقریباً 40 ہزار دیہات میں منعقد ہونے والی تقریبات کو شامل کیے بغیر ہیں۔ دیہی آبادی کو شمار نہ کرنے کے باوجود عوامی حاضری کروڑوں تک پہنچی، جو انقلاب اسلامی سے وابستگی اور قومی یکجہتی کا واضح اظہار ہے۔
دارالحکومت تہران میں عوام کی شرکت 38 لاکھ سے 42 لاکھ افراد کے درمیان بتائی گئی ہے۔ مرکزی شاہراہوں اور بڑے چوراہوں پر لوگوں کا غیر معمولی ہجوم دیکھنے میں آیا اور شہر کے مختلف علاقوں میں عوام صبح سے ہی ریلیوں میں شریک ہوتے رہے۔
دیگر صوبوں میں بھی بھرپور جوش و خروش دیکھنے میں آیا۔ اندازوں کے مطابق مختلف شہروں میں 19 سے 22 ملین افراد شریک ہوئے۔ متعدد مقامات پر گزشتہ برسوں کے مقابلے میں زیادہ رش ریکارڈ کیا گیا۔
قم میں حرم حضرت فاطمہ معصومہ سلام اللہ علیہا کی جانب جانے والے چاروں راستے عوام سے بھرے رہے۔ میدان جہاد، میدان مطہری، شاہراہِ شہدا اور شاہراہِ آذر کے اطراف غیر معمولی ہجوم دیکھنے میں آیا۔
اصفہان میں میدان امام خمینی کے علاوہ شاہراہِ حافظ اور شاہراہِ سپاہ بھی مکمل طور پر آباد رہیں۔ میدان امام حسین اور اس سے ملحقہ سڑکوں پر اس قدر رش تھا کہ بہت سے افراد مرکزی مقام تک نہ پہنچ سکے۔ ابتدائی اندازے کے مطابق اصفہان میں تقریباً چار لاکھ افراد شریک ہوئے۔
اسی طرح مشہد، ایلام، ہمدان، یاسوج، اہواز، تبریز، ارومیہ اور خرمآباد سمیت دیگر شہروں میں بھی عوام کی بڑی تعداد سڑکوں پر نظر آئی۔ مبصرین کے مطابق 22 بہمن کی یہ ریلیاں عوامی اتحاد، استقامت اور انقلاب اسلامی سے وفاداری کا بھرپور مظہر ثابت ہوئیں۔
آپ کا تبصرہ