حوزہ نیوز ایجنسی کی رپورٹ کے مطابق، 25 ستمبر کو مولانا معصوم رضا کیفی نے جمعہ کے خطبے میں قرآن مجید کی اس آیت سے آغاز کیا: وَاشْكُرُوا نِعْمَتَ اللَّهِ إِنْ كُنتُمْ إِيَّاهُ تَعْبُدُونَ۔ یعنی: ’’اگر تم صرف اسی کی عبادت کرتے ہو تو اللہ کی نعمت کا شکر ادا کرو۔‘‘
انہوں نے کہا کہ اس آیت میں انسان کو اللہ تعالیٰ کی نعمتوں کو پہچاننے اور ان کا شکر ادا کرنے کی واضح ہدایت دی گئی ہے۔
مولانا نے امام جعفر صادق علیہ السلام سے منقول رسول اکرم صلی اللہ علیہ وآلہ وسلم کی روایت بیان کرتے ہوئے کہا کہ جب آپؐ کو کوئی خوشی کی خبر ملتی تو فرماتے:
الْحَمْدُ لِلَّهِ عَلَى هَذِهِ النِّعْمَةِ
یعنی: ’’اس نعمت پر اللہ کی حمد ہے۔‘‘
انہوں نے کہا کہ انسان کو اپنی زندگی میں ملنے والی ہر نعمت کو اللہ تعالیٰ کی عطا سمجھنا چاہیے۔ مال، صحت، علم، اولاد، خاندان اور زندگی کی دیگر سہولتیں صرف انسان کی اپنی قابلیت کا نتیجہ نہیں بلکہ اللہ کی عطا ہیں۔ اس لیے نعمت ملنے پر غرور کرنے کے بجائے اللہ کے حضور شکر گزار ہونا چاہیے۔
مولانا معصوم رضا کیفی نے کہا کہ حقیقی شکر صرف زبان سے ’’الحمدللہ‘‘ کہنے کا نام نہیں بلکہ نعمت کا صحیح استعمال بھی شکر کا حصہ ہے۔ اگر اللہ نے کسی کو مال دیا ہے تو اسے ضرورت مندوں کی مدد اور جائز کاموں میں خرچ کرنا چاہیے اور اگر علم عطا کیا ہے تو اسے دوسروں کی رہنمائی اور معاشرے کی بھلائی کے لیے استعمال کرنا چاہیے۔
انہوں نے نعمتوں میں اسراف اور بربادی سے بچنے پر زور دیتے ہوئے کہا کہ اللہ کی عطا کردہ نعمت کو غلط اور ناجائز کاموں میں استعمال کرنا شکر کے بجائے ناشکری کا سبب بن سکتا ہے۔
انہوں نے مزید کہا کہ انسان جتنا بھی شکر ادا کرے، اللہ تعالیٰ کی نعمتوں کا پورا حق ادا نہیں کرسکتا۔ سانس، صحت، خاندان، رزق، ایمان اور ہدایت جیسی نعمتیں بے شمار ہیں اور انسان ان کا مکمل شمار بھی نہیں کرسکتا۔ یہاں تک کہ شکر ادا کرنے کی توفیق بھی خود ایک نعمت ہے۔
خطبے کے اختتام پر مولانا معصوم رضا کیفی نے کہا کہ حقیقی بندہ وہ ہے جو نعمت ملنے پر اللہ کا شکر ادا کرے، پریشانی میں صبر کرے اور ہر حال میں اللہ تعالیٰ سے اپنا تعلق مضبوط رکھے۔ انہوں نے کہا کہ اگر انسان اللہ کی نعمتوں کو پہچان کر ان کا صحیح استعمال کرے اور ضرورت مندوں تک بھی ان کا حق پہنچائے تو وہ اللہ کے لطف و کرم کا مستحق بن سکتا ہے۔
آپ کا تبصرہ