حوزہ نیوز ایجنسی کی رپورٹ کے مطابق، پاراچنار/ خیبر پختونخوا کے قبائلی ضلع کرم کے مرکزی شہر پاراچنار میں آج جمعہ کے خطبے کے دوران معاشرتی مسائل اور روزمرہ زندگی میں پائی جانے والی برائیوں کے حوالے سے اہم امور پر گفتگو کی گئی۔
حجۃ الاسلام والمسلمین مولانا نور حسین نجفی نے اپنے خطاب میں معاشرے میں بڑھتی ہوئی فحاشی اور دیگر سماجی برائیوں کی روک تھام کے لیے مؤثر اور سخت انتظامات کرنے پر زور دیا۔ انہوں نے کہا کہ معاشرے کی اصلاح اور نوجوان نسل کو منفی سرگرمیوں سے محفوظ رکھنے کے لیے منظم اقدامات وقت کی اہم ضرورت ہیں۔
مولانا نور حسین نجفی نے کہا کہ پاراچنار شہداء کی سرزمین ہے، اس لیے اس مقدس سرزمین کو منشیات سمیت دیگر سماجی برائیوں سے پاک رکھنے کے لیے خصوصی توجہ کی ضرورت ہے۔ انہوں نے ضلع کرم کے متعلقہ ذمہ داران پر زور دیا کہ منشیات کے پھیلاؤ اور دیگر معاشرتی برائیوں کی روک تھام کے لیے مؤثر اور عملی اقدامات کیے جائیں۔
خطبے کے اختتام پر مولانا نور حسین نجفی نے اسلامی جمہوریہ ایران، انصار اللہ یمن اور حزب اللہ کے لیے خصوصی دعائیں بھی کیں اور ان کی کامیابی و سرخروئی کے لیے دعا کی۔
آپ کا تبصرہ