حوزہ نیوز ایجنسی کے خبر نگار سے ایران کے شہر مریوان کے اہل سنت امام جمعہ مولوی مصطفی شیرزادی نے گفتگو کرتے ہوئے کہا: محرم الحرام اسلام کے اہم ترین مہینوں میں سے ایک ہے کیونکہ اس مہینہ میں ہمیشہ کے لئے اسلام کی تقدیر کا فیصلہ ہوگیا۔
شہر مریوان کے امام جمعہ نے کہا: اسلام درباری دین میں تبدیل ہو رہا تھا لیکن فرزند رسول امام حسین علیہ السلام کے قیام سے اسلام کو دوبارہ زندگی ملی۔
انہوں نے مزید کہا: ضرورت اس امر کی ہے کہ عصر حاضر کے جوانوں کو قیام امام حسین علیہ السلام کے اہداف سے آگاہ کیا جائے۔ دشمن ہمارے جوانوں کو دین سے منحرف کرنے کے لئے بہت زیادہ سرمایہ خرچ کر رہا ہے۔
شہر مریوان کے امام جمعہ نے کہا: مکتب عاشورا کی شناخت مسلمان جوانوں کو داخلی اور خارجی دشمنوں کے شیطانی ہتھکنڈوں سے محفوظ رکھتی ہے۔
انہوں نے کہا: امام حسین علیہ السلام تمام شیعہ و سنی مسلمانوں سے متعلق ہیں۔
