حوزہ نیوز ایجنسی|

کعبہ بےچین ہے اور خاک بہ سر ہے دیوار
بس علی ع کے لیے منت کشِ در ہے دیوار

احدیت کا ہے جھومر ، ترے ماتھے کا نشاں
نور بکھرا ترا تا حدِ نظر ہے دیوار

عام رستے سے بھلا داخلِ کعبہ کیوں ہو !!؟
ترے آگے ابو طالب ع کا پسر ہے دیوار

کوششیں لاکھ چھپانے کی کریں اہلِ عناد
اس نشاں کے لیے خود سینہ سپر ہے دیوار

دامنِ شق ترا تکتا ہوں بڑی حیرت سے !
جیسے یہ معجزۂ شقِ قمر ہے دیوار

جب سے اترا ہے لبِ صحنِ حرم ماہِ رجب
تزکرہ تیرا ہی بس شام و سحر ہے دیوار

دل کشی پر تری ہوتے ہیں سماوات نثار !
تیرا یہ ایک نشاں رشکِ قمر ہے دیوار

وارث لمحہء کن ، آیا ہے نزدیک حرم
جھوم کے سجدے میں گر ، وقت سحر ہے دیوار

جس نے امکان کے ہاتھوں میں دیا عطر وجود
اس کی خوشبو سے بدن تیرا بھی تر ہے دیوار

ندیم سرسوی