حوزہ نیوز ایجنسی کی رپورٹ کے مطابق، آیت اللہ اعرافی نے خواتین کی اس سال کی بہترین کتاب کے سلسلے میں منعقدہ کانفرنس سے خطاب کرتے ہوئے کہا کہ ہم ایک حساس تاریخی موڑ پر ہیں جہاں حضرت فاطمہ زہرا (س) کی تعلیمات اور کردار عصر حاضر کے چیلنجز سے نمٹنے کے لیے مشعل راہ بن سکتے ہیں۔ ان کی مختصر مگر بااثر زندگی ایک مثال ہے کہ کس طرح ایک مضبوط روحانی بنیاد انسانی تمدن کو تبدیل کر سکتی ہے۔
آیت اللہ اعرافی نے خواتین کے علمی کردار پر زور دیتے ہوئے کہا کہ ہمیں آئندہ 10 سے 20 سال میں کم از کم 100 اعلیٰ سطحی مفکرین، فلسفی، فقیہ اور مفسر خواتین تیار کرنے کی ضرورت ہے۔ انہوں نے کہا کہ دینی مدارس خصوصاً خواتین کے مدارس کو علمی اور تمدنی قیادت کے لیے تیار کرنا وقت کی اہم ضرورت ہے۔
انہوں نے اس بات پر زور دیا کہ مغربی تمدن، جو فردیت، لذت پرستی، اور خاندان کے نظام کو فاسد کرنے پر مبنی ہے، اس نے موجودہ خاندانی نظام کو تباہی کے دہانے پر پہنچا دیا ہے۔ اس کے مقابلے میں اسلامی تمدن کی بنیاد پر مبنی مضبوط خاندانی ڈھانچے کی تعمیر ضروری ہے۔
آیت اللہ اعرافی نے حضرت فاطمہ زہرا (س) کی شخصیت کو انسانی تمدن کی تشکیل میں رہنما قرار دیا۔ انہوں نے کہا کہ ان کی نماز اور عبودیت نے نہ صرف روحانی کائنات کو روشن کیا بلکہ وہ انسانی فہم اور تمدن کو بھی نئی جہت دینے والی شخصیت تھیں۔ ان کی جدوجہد نے اسلامی تمدن کی بنیاد رکھی اور آنے والی نسلوں کو روشنی فراہم کی۔
انہوں نے کہا کہ اسلامی تعلیمات کو عملی طور پر نافذ کرنے کے لیے نظریاتی اور عملی جدوجہد کی ضرورت ہے۔ ہمیں فکری بنیادوں کو جدید تقاضوں کے مطابق ڈھالنے اور نئے علمی نظریات پیدا کرنے کی ضرورت ہے، تاکہ مغربی اثرات کا موثر مقابلہ کیا جا سکے۔
آخر میں انہوں نے زور دیا کہ فاطمی ثقافت اور جدو جہد کو اپنانا ہی اس حساس موڑ پر انقلاب اسلامی کو مزید مضبوط کر سکتا ہے۔ اس مقصد کے لیے مدارس اور علمی ادارے اہم کردار ادا کر سکتے ہیں۔
