حوزہ نیوز ایجنسی کی رپورٹ کے مطابق، سربراہ حوزہ علمیہ ایران آیت اللہ اعرافی نے ایامِ فاطمیہ کی مناسبت سے جاری پیغام میں تین روزہ تعطیل کا اعلان کرتے ہوئے حضرت فاطمہ زہرا سلام اللہ علیہا کی تعلیمات کے فروغ کے لیے تبلیغ فاطمی نامی تحریک کا آغاز کیا۔
تعلیماتِ فاطمی کے فروغ کی ضرورت
آیت اللہ اعرافی نے کہا کہ موجودہ دور میں ایران اور دنیا کے نوجوانوں کو حضرت فاطمہ زہرا سلام اللہ علیہا کی گہری معرفت اور تعلیمات کی اشد ضرورت ہے۔ انہوں نے علماء اور تبلیغی اداروں سے مطالبہ کیا کہ وہ ان معارف کے فروغ اور اسلامی شعائر کے احیاء کے لیے ہر ممکن وسائل بروئے کار لائیں۔
حوزہ علمیہ میں تین روزہ تعطیل
انہوں نے یکم سے تین جمادی الثانی تک حوزہ علمیہ میں تعطیل کا اعلان کیا۔ طلاب اور فضلاء کو تبلیغی سرگرمیوں میں حصہ لینے کی ترغیب دیتے ہوئے کہا کہ اس دوران غیرحاضری معاف شمار کی جائے گی۔
امت مسلمہ کے مسائل پر زور
آیت اللہ اعرافی نے فلسطین، غزہ، اور لبنان کے مظلوم عوام کی حمایت پر زور دیتے ہوئے کہا کہ ایامِ فاطمیہ کی مجالس میں صیہونی مظالم کے خلاف آواز اٹھائی جائے اور امتِ مسلمہ کے مسائل پر توجہ مرکوز کی جائے۔ انہوں نے مقاومت کو مضبوط کرنے اور صیہونی و سامراجی سازشوں کا مدلل جواب دینے کی اہمیت پر بھی زور دیا۔
خواتین اور گھرانے کی اہمیت
انہوں نے خواتین اور گھرانے سے متعلق مسائل کو آج کے دور کے اہم موضوعات قرار دیتے ہوئے کہا کہ حضرت فاطمہ زہرا سلام اللہ علیہا کی سیرت ایک مثالی مسلم خاتون اور خاندان کے اصولوں کی نمائندگی کرتی ہے۔ آیت اللہ اعرافی نے علمائے کرام اور تبلیغی اداروں کو اس موضوع پر خصوصی توجہ دینے کی تاکید کی۔
علماء اور عوام سے تعاون کی اپیل
آیت اللہ اعرافی نے علماء، تبلیغی اداروں، اور عوام کا شکریہ ادا کرتے ہوئے ان سے ایامِ فاطمیہ کی تبلیغی سرگرمیوں میں بھرپور شرکت کی اپیل کی۔
انہوں نے امام زمانہ عج اللہ تعالی فرجہ الشریف کے ظہور اور امتِ مسلمہ کی کامیابی کی دعا کرتے ہوئے تمام مبلغین کو ان کی ذمہ داریوں میں کامیابی کی دعا دی۔
