حوزہ نیوز ایجنسی کی رپورٹ کے مطابق، الانوار النجفیہ فاؤنڈیشن کے جنرل سیکریٹری حجۃ الإسلام شیخ علی النجفی کی زیر نگرانی اور موجودگی میں مدارس دار الزہرا (علیہا السلام) میں یتیم بچوں کے لیے ایک خصوصی تقریب منعقد کی گئی، اس تقریب میں مدارس کی انتظامیہ، تدریسی عملے اور طالبات کی بڑی تعداد نے شرکت کی۔
تقریب کے دوران طالبات اور طلبہ کے لیے الگ الگ "جشن تکلیف شرعی" کا اہتمام کیا گیا۔ حجۃ الإسلام شیخ علی النجفی نے تکلیف کے مرحلے میں داخل ہونے والے طلبہ و طالبات کو مبارکباد پیش کی اور اپنے خطاب میں سیدہ فاطمہ الزہرا (علیہا السلام) کے اسوۂ حسنہ کو اپنانے اور عبادات کے ذریعے اللہ کی قربت حاصل کرنے کی اہمیت پر روشنی ڈالی۔ انہوں نے اہل بیت (علیہم السلام) کی زندگی کے اصولوں پر عمل کرنے، روزمرہ زندگی میں حسن اخلاق اپنانے اور دین اسلام کی دعوت کے فروغ پر زور دیا۔
شیخ علی النجفی نے کہا کہ اہل بیت (علیہم السلام) کے نقش قدم پر چلنا ہر مسلمان کے لیے ضروری ہے، کیونکہ یہی راستہ دین اور دنیا میں کامیابی کی ضمانت ہے۔ آخر میں انہوں نے دعا کی کہ اللہ تعالیٰ طلبہ و طالبات کو کامیابی اور نیک راستوں پر گامزن کرے۔
تقریب کا آغاز قرآن مجید کی تلاوت سے ہوا، جس کے بعد حجۃ الإسلام شیخ علی النجفی نے خطاب کیا۔ محفل میں مذہبی نغمے پیش کیے گئے اور طلبہ و طالبات کی جانب سے ثقافتی پروگرامز بھی پیش کیے گئے۔ اس تقریب میں شیخ احمد الدر العاملی نے بھی خصوصی شرکت کی۔
آخر میں، امتحانات میں نمایاں کارکردگی دکھانے والے طلبہ و طالبات میں انعامات تقسیم کیے گئے۔ انعامات حاصل کرنے والوں میں چھٹی اور آٹھویں جماعت کے طلبہ بھی شامل تھے۔ مدارس کے ڈائریکٹر جناب صفاء العیفاری نے بتایا کہ یہ تقریب سیدہ الزہرا (علیہا السلام) کی ولادت کی خوشی میں منعقد کی گئی، تاکہ طلبہ و طالبات کو روحانی تربیت کے ساتھ دین کی بنیادوں کو مضبوط بنانے کا موقع فراہم کیا جا سکے۔
آپ کا تبصرہ