حوزہ نیوز ایجنسی کے مطابق، سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی 3 روزہ تنظیمی دورے پر اسلام آباد سے وسطی پنجاب پہنچ گئے۔
رپورٹ کے مطابق ان کے ساہیوال آمد پر علماء کرام و کارکنان کی جانب سے شاندار استقبال کیا گیا۔ بعد ازاں انہوں نے 13 رجب المرجب 1446ھ ولادت باسعادت امیرالمومنین علی ابن ابی طالب علیہ السلام کی مناسبت سے منعقدہ جشن اور تنظیمی احباب کی نشست سے خطاب کرتے ہوئے کہا: سب سے پہلے میں تمام احباب کو ولادت باسعادت امیرالمومنین علی ابن ابی طالب علیہ السلام کی مبارکباد پیش کرتا ہوں اور میرے لیے سعادت ہے کہ آپ عزیز دوستان کی زیارت کا شرف حاصل ہوا۔
انہوں نے کہا: ہم سب کو حضرت امیرالمومنین علیہ السلام کی علمی اور شجاعانہ قیادت سے استفادہ حاصل کر کے آج کے ان شیطانی طاقتوں کی پہچان کے ساتھ مستقبل پر بھی گہری نظر رکھنے کی ضرورت ہے۔
علامہ شبیر میثمی نے کہا: وطن عزیز کی موجودہ صورتحال بالخصوص پاراچنار کے حوالے سے صورتحال ابھی تک تشویشناک ہے، اس حوالے سے قائد محترم کی جانب سے مسلسل کوششیں بھی جاری و ساری ہیں۔ ہماری جدوجہد تسلسل کے ساتھ جاری ہے۔
قابل ذکر ہے کہ آخر میں جشن کی مناسبت سے کیک بھی کاٹا گیا، اس موقع پر صوبائی صدر وسطی پنجاب سید ساجد حسین نقوی، مولانا اعجاز حسین مہدی ، مولانا فیاض حسین مطہری، مولانا امداد علی گھلو، برادر رفعت عباس زیدی و دیگر رفقاء بھی ہمراہ موجود تھے۔
آپ کا تبصرہ