حوزہ نیوز ایجنسی کی رپورٹ کے مطابق،لاہور/ وفاق المدارس الشیعہ پاکستان کے صدر آیت اللہ حافظ سید ریاض حسین نجفی نے کہا ہے کہ ماہ رمضان المبارک میں ہم اللہ کے مہمان ہیں وہ ہمارا میزبان ہے، یہ خیال رہے کہ وہ خالق ہے اور ہم مخلوق ۔مکرم اور مقرب ترین بندہ وہ ہے جو تقوی اختیار کرے۔ ایسا بندہ جو اللہ کی طرف سے مقررہ حدود سے تجاوز نہ کرے،اللہ کے ساتھ رابطہ برقرار رکھے وہ متقی ہے۔
انہوں نے کہا اللہ سے اپنے تعلق کو مضبوط رکھنے کا بہترین ذریعہ دعا ہے۔ اللہ کے سامنے ہم سب فقیر ہیں ،غنی صرف اللہ کی ذات ہے، چاہے کوئی کروڑ پتی ہے یا جتنا بھی صاحب ثروت ہے لیکن اللہ کی ذات کے سامنے سب محتاج ہیں۔ان کا کہنا تھا کہ اسلام کے مخلص بنو اور دعا کرو۔ پھر خدا کے پاس تمہاری دعا قبول ہوگی۔
جامع مسجد علی حوزہ علمیہ جامعتہ المنتظر ماڈل ٹاون میں خطبہ جمعہ دیتے ہوئے حافظ ریاض نجفی نے کہا دعا کرتے ہوئے انسان کو یہ لالچ یعنی رغبت ہونی چاہیے کہ د عا قبول ہوگی اور دوسری طرف خوف بھی ہونا چاہیے کہ شاید دعا قبو ل نہ بھی ہو۔ انہوں نے کہا اللہ کا حقیقی بندہ ہونے سے انسان کی نگاہ میں حیا پیدا ہو گی اورکردار بلند ہو گا۔ ان کا کہنا تھا کہ جب بارگاہ رب العزت میں دعا کی جائے تو اعتماد ہونا چاہئے۔
حافظ ریاض نجفی نے کہا کہ دعا کرنے سے ہدایت اور رہنمائی بھی بڑھ جاتی ہے اورانسان حوادث کا مقابلہ کرتا ہے۔ ان کا کہنا تھا کہ جب انسان جب دعا کرتا ہے تو فیض باری چاہتا ہے ۔یہ سب کمال ہے کہ انسان اتنا اچھا ہو گیا ہے کہ اللہ رب العزت سے مانگ رہا ہے۔ دعا ہمیں درس دیتی ہے کہ ہم قوانین الٰہی پر عمل پیرا ہوں۔
آپ کا تبصرہ