حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے عید الفطر 1446 ھ کے موقع پراُمت مسلمہ کو عید کے موقع پر مباکباد پیش کرتے ہوئے کہا: وطن عزیز پاکستان کا المیہ ہے کہ یہاں اگرچہ عید کا دن تو ہرسال اپنی روایت کے مطابق طلوع ہوتا ہے لیکن ہر سال کی طرح حالیہ عید پر بھی ہمیں غربت، جہالت، مہنگائی، بے روزگاری، معاشرتی اور تعلیمی مسائل، مختلف امراض، جرائم اور بدامنی خاص طور پر انتہاء پسندی جیسے سنگین مسائل کا سامنا ہے۔
انہوں نے کہا: عید کا دن ہمیں اتحاد جیسے قرآنی اور نبوی فریضے کی طرف رہنمائی کرتا ہے اس اتحاد کو آئندہ عید تک اسی جوش و جذبے اور خلوص و ولولے کے ساتھ جاری رکھنا ہو گا۔
علامہ سید ساجد علی نقوی نے کہا: عیدکا دن ہمیں عادلانہ نظام کے قیام کی جدوجہد کی طرف متوجہ کرتا ہے۔اس موقع پر ہمیں یہ عزم بھی دہرانا ہوگا کہ عالم اسلام کی مشکلات جن میں بیت المقدس کی آزادی' غزہ کی ناگفتہ بہ صورتحال اورکشمیر کی سوگوار فضا سرفہرست ہیں کے حل کیلئے اپنے حصہ کی جدوجہد کرتے رہیں گے، دنیا بھر میں چلنے والی آزادی و حریت کی تحاریک کا سلسلہ جاری رہے گا۔
آپ کا تبصرہ