حوزہ نیوز ایجنسی کی رپورٹ کے مطابق، مولانا محمد ظفر حسین معروفی مدرس حوزۂ علمیہ بقیۃ اللہ جلالپور امبیڈکر نگر یوپی نے مرحوم استاد مولانا ارشاد حسین معروفی کے سانحۂ ارتحال پر ایک تعزیتی پیغام میں گہرے دکھ اور افسوس کا اظہار کرتے ہوئے خانوادہ کی خدمت میں تعزیت پیش کی ہے۔
تعزیتی پیغام کا متن مندرجہ ذیل ہے:
قال علی ابن ابی طالب علیہ السلام: خالطوا الناس مخالطۃ اذا متم علیھا بکوا علیکم وان عشتم حنوا الیکم. ایسے رہو کہ تمہاری شخصیت، تمہاری مہربانی اور تمہارا اخلاق لوگوں کے دلوں میں گھر کر جائے، تم سے ملنے والے تمہاری صحبت کو ایک نعمت سمجھیں اور ہمیشہ تمہاری طرف توجہ رکھیں ایسے نیک اعمال چھوڑ جاؤ کہ جب تم اس دنیا سے جاؤ تو لوگ تمہیں یاد کرکے اشک بہائیں، کیونکہ تمہارا وجود لوگوں کے لیے ایک عطیہ تھا۔
آہ! گلشنِ ہستی میں جن قابلِ قدر شخصیات نے اپنے خون جگر سے چمن کی آب پاشی کی ہے اور رہتی دنیا تک کے لیے اپنی حیات مستعار کے بیش قیمت نقوش انسانی دلوں پر مرتسم کئے ہیں ان میں ایک نمایاں نام استاذ الاساتذہ مسند تدریس کی آبرو ماہر فلسفہ و ادب محقق و ادیب حجۃ الاسلام عالی جناب مولانا ارشاد حسین معروفی طاب ثراہ کا ہے۔
آپ نے ایک زمانے تک تدریسی خدمات انجام دیں اور مقبولیت کا اعلیٰ ترین مقام حاصل کیا آپ کا شوق تدریس اورسبق میں انہماک حضرات اکابر کی یاد تازہ کرتا تھا۔
حقیقت یہ ہے کہ وہ فنا فی العلم تھے اور ان کی شخصیت سے علم کی خوشبو مہکتی تھی۔ علم ان کا اوڑھنا بچھونا تھا وہ اپنی مسلسل محنت اور علمی اشتغال کے اعتبار سے اسلاف کی یادگار تھے۔
بہرحال مولانا ارشاد حسین معروفی طاب ثراہ کی شخصیت کئی جہتوں پر مشتمل تھی وہ اپنے علم ،اخلاق،تدریس اور دینی خدمات کی وجہ سے ایک ممتاز مقام کے حامل تھے،ان کی پوری زندگی سادگی، تقوی' اور خشیت الٰہی سے عبارت تھی دنیاوی شہرت یا ریاکاری سے دور رہ کر صرف رضائے الہٰی کے لیے دینی خدمات انجام دیتے رہے مولانا مرحوم کے چلے جانے سے ادبی حلقے میں ایسا خلا واقع ہوا ہے کہ جو شاید ہی پر ہوسکے ان کی وفات نے ہمارے دلوں پر گہرا اثر چھوڑا ہے۔
اپنے شفیق استاذ کو خراجِ تحسین پیش کرتے ہوئے غم کی اس گھڑی میں اہل خانہ، لواحقین، وابستگان ،پسماندگان اور تلامذہ کی خدمت میں تعزیت پیش کرتا ہوں اور دعا گو ہوں کہ اللہ مرحوم کو ان کی نیک خدمات کے صلہ میں جوار معصومین علیہم السّلام میں جگہ عطا فرمائے اور جنت الفردوس میں اعلٰی مقام عطا کرے! ساتھ ہی اہل تعلق کو صبر جمیل عطا فرمائے۔
آمین یا رب العالمین
شریک غم
محمد ظفر حسین معروفی
مدرس حوزۂ علمیہ بقیۃ اللہ
جلالپور امبیڈکر نگر یوپی
آپ کا تبصرہ