حوزہ نیوز ایجنسی کی رپورٹ کے مطابق، رہبرِ انقلابِ اسلامی حضرت آیت اللہ العظمٰی امام سید علی حسینی خامنہ ای کے ہندوستان میں نمائندے حجت الاسلام حکیم الہی نے مولانا کلب جواد نقوی سے ان کی رہائش گاہ پر ملاقات اور اہم امور پر تبادلہ خیال کیا ہے۔
اس موقع پر نمائندہ ولی فقیہ نے مجلسِ علمائے ہند کے دفتر اور حوزہ علمیہ حضرت غفران مآب ؒ کا دورہ بھی کیا۔
تفصیلات کے مطابق، لکھنؤ ۱۸ اپریل؛ ولی امر مسلمین رہبرِ انقلابِ اسلامی آیت اللہ العظمیٰ سید علی خامنہ ای کے ہندوستان میں نو منتخب نمائندے حجۃ الاسلام آقائے عبد المجید حکیم الہی نے آج مجلسِ علمائے ہند کے جنرل سکریٹری مولانا سید کلب جواد نقوی سے ان کی رہائش گاہ پر خیر سگالی ملاقات کی، ملاقات کے بعد وہ جامع مسجد آصفی میں نمازِ جمعہ میں بھی شریک ہوئے اور نمازیوں سے خطاب بھی فرمایا۔
انہوں نے کہا کہ مسلمان کا اخلاق سب سے اچھا ہونا چاہیے، کیونکہ ہم اس رسولؐ کی امت ہیں، جس کو قرآن مجید نے خُلق عظیم کے درجے پر فائز قرار دیا ہے۔
نماز جمعہ کے بعد نمائندۂ ولی فقیہ حجت الاسلام حکیم الہی امام باڑہ غفران مآب تشریف لائے، جہاں انہوں نے مدفون علماء اور مجتہدین کی قبروں پر فاتحہ خوانی کی۔
اس دوران انہوں نے مجلسِ علمائے ہند کے دفتر کا دورہ بھی کیا، ان کے ساتھ مولانا کلب جواد نقوی، مولانا تقی حیدر نقوی، مولانا قمر حسنین اور مولانا عادل فراز نقوی بھی دفتر مجلسِ علمائے ہند میں موجود تھے۔
کارکنانِ دفتر نے انہیں پھول پیش کئےاور سرزمین لکھنؤ پر انہیں خوش آمدید کہا۔
مجلسِ علمائے ہند کے بعد آقائے حکیم الہی حوزہ علمیہ حضرت دلدار علی غفران مآبؒ تشریف لے گئے، جہاں انہوں نے تعلیم و تربیت کی ضرورت اور انسانی زندگی میں اخلاق کی اہمیت کے موضوع پر طلبہ سے خطاب کیا۔
اس دوران حوزہ علمیہ حضرت غفران مآبؒ کے سرپرست مولانا کلب جواد نقوی، مدرسے کے پرنسپل مولانا سید رضا حیدر زیدی، وائس پرنسپل مولانا نثار احمد زین پوری اور مدرسے کے اساتذہ موجود تھے۔
حوزہ علمیہ غفران مآبؒ پہونچتے ہی نمائندہ ولی فقیہ کا پرتپاک خیر مقدم کیا گیا اور مولانا کلب جواد نقوی اور مولانا رضا حیدر نے تمام اساتذہ اور طلبہ کے ساتھ انہیں پھول پیش کئے۔
آپ کا تبصرہ