تحریکِ بیداری اُمتِ مصطفیٰؐ کے زیر اہتمام غزہ کانفرنس کا انعقاد؛ غزہ پر مؤثر آواز کے لیے  مشترکہ جدوجہد ناگزیر ہے، مقررین

حوزہ نیوز ایجنسی کی رپورٹ کے مطابق، تحریکِ بیداری اُمتِ مصطفیٰؐ کے تحت آی ایچ برنی کانفرنس ہال کراچی میں "غزہ میں کیا ہو رہا ہے، اور ہمیں کیا ہو گیا ہے؟" کے عنوان سے کانفرنس منعقد ہوئی، جس کی صدارت مرکزی مسئول تحریک بیداری امت مصطفےؐ آغا محمد تقی نے کی۔

کانفرنس میں رہنما جماعت اسلامی جناب مسلم پرویز، علامہ امین شہیدی، مرکزی رہنما شیعہ علماء کونسل علامہ ناظر عباس، رہنما JUI مولانا محمود الحسینی، سیکریٹری فلسطین فائونڈیشن ڈاکٹرصابر ابو مریم، سماجی رہنما حسین رضوی، علامہ اصغر درس، مفتی مرتضی رہمانی، بیرسٹر آصف ابڑو، مولانا ذین رضا، مسئول مجمعہ المدارس مولانا باقر شجاعی، بزرگ رہنما مولانا جعفر سبحانی، مولانا محسن قمی، رہنما PAT رائو کامران سمیت ملک کی نمایاں مذہبی و فکری شخصیات شریک ہوئیں۔

آغا محمد تقی نے کہا کہ وہ نظریہ جو مزاحمت، آزادی اور عزتِ نفس کا علمبردار تھا، آج عالمی خاموشی کی گہری لہر میں دفن کیا جا رہا ہے۔ امت مسلمہ کا ضمیر، جو کبھی مزاحمت اور جرأت کا نشان تھا، آج مصلحتوں اور بے حسی کی زنجیروں میں جکڑا ہوا ہے۔ جن قدموں کو اٹھنا تھا، وہ بے حرکت ہیں، اور جن زبانوں کو پکارنا تھا، وہ مصلحتوں کے قفل میں بند ہیں۔ ایسے میں قرآن کا سوال گونج رہا ہے: کہ تمہیں کیا ہو گیا ہے کہ تم اللہ کی راہ میں اور ان مظلوم مردوں، عورتوں اور بچوں کے لیے نہیں لڑتے جو فریاد کرتے ہیں کہ ہمارے لیے کوئی مددگار بھیج دے۔

انہوں نے مزید کہا کہ فلسطین جیسے عظیم انسانی و اسلامی مسئلے پر مؤثر اور بامقصد آواز بلند کرنے کے لیے ضروری ہے کہ شیعہ اور سنی دونوں مکاتبِ فکر باہمی اعتماد، خلوصِ نیت اور احساسِ ذمہ داری کے ساتھ ایک دوسرے کے شانہ بشانہ کھڑے ہوں۔ ان کے مابین فکری ہم آہنگی اور عملی اشتراک ایسا غیر متزلزل اتحاد تشکیل دے گا جو نہ صرف امت کو اندرونی خلفشار اور فرقہ وارانہ تقسیم سے نجات دلائے گا، بلکہ دنیا کو یہ واضح پیغام دے گا کہ امتِ مسلمہ فرقوں، قوموں اور جغرافیائی سرحدوں سے بالا تر ہو کر مظلوم فلسطینی عوام کے ساتھ یکجان و یک آواز ہے۔

انہوں نے مزید کہا کہ ہمارے لیے حماس اور حزب اللہ کی مثالیں مشعلِ راہ ہیں، جنہوں نے شیعہ سنی اختلافات سے بالاتر ہو کر مشترکہ مزاحمتی صف بندی قائم کی، ایک دوسرے کے لیے جانیں قربان کیں، اور وفاداری، قربانی اور اخلاص کی تاریخ رقم کی۔

مقررین نے کہا کہ انیس مہینے سے جاری اسرائیلی مظالم پر امت کی خاموشی ملتِ اسلامیہ کے شایانِ شان نہیں۔ اب وقت آ چکا ہے کہ غزہ کو مرکزِ وحدت بنا کر ایک ایسا جامع، بامعنی اور غالب بیانیہ تشکیل دیا جائے جو میڈیا پر چھائے وقتی، سطحی اور غیر اہم بیانیوں کو پسِ پشت ڈال دے۔ ملک کے دس بڑے شہروں میں مشترکہ، منظم اور متحدہ عوامی اجتماعات منعقد کیے جائیں، تاکہ قوم فکری طور پر بیدار، عملی طور پر متحرک، اور وحدت کے سانچے میں ڈھل کر ایک مؤثر قوت کے طور پر اُبھرے، یہی وہ راستہ ہے جو پاکستان میں ایک ہم آہنگ، مضبوط اور بیدار اسلامی تحریک کی بنیاد رکھ سکتا ہے۔