حوزہ نیوز ایجنسی کی رپورٹ کے مطابق، ایم ڈبلیو ایم کے پارلیمانی لیڈر اور رکن قومی اسمبلی انجینئر حمید حسین نے گزشتہ دنوں چیف سیکرٹری خیبرپختونخوا اور آئی جی خیبر پختونخوا خواہ کے ہمراہ پارا چنار ضلع کرم کا دورہ کیا ہے۔
اس دوران انجینئر حمید حسین طوری نے گورنر کاٹیج پارا چنار میں ایک اہم جرگہ سے خطاب کرتے ہوئے کہا کہ ٹل پارہ چنار روڈ صرف ایک سڑک نہیں، بلکہ ہماری شہ رگِ حیات ہے؛ اس کی سلامتی اور بحالی ہمارے لیے قومی وقار اور عزت کا مسئلہ ہے۔
انہوں نے زور دیا کہ چپھری سے لے کر تری منگل تک تمام راستوں کو مکمل طور پر محفوظ بنایا جائے اور فوری طور پر بحال کیا جائے، تاکہ عوام کو درپیش مشکلات کا خاتمہ ہو سکے۔
انہوں نے چیف سیکرٹری خیبر پختونخواہ، سیکرٹری ہیلتھ، کمشنر کوہاٹ ڈویژن اور دیگر افسران کے ہمراہ ڈسٹرکٹ ہیڈ کوارٹر ہسپتال پارہ چنار کا دورہ بھی کیا اور ہسپتال اپگریڈیش، ادویات کی فراہمی، آکسیجن پلانٹ و دیگر سہولیات کی فوری فراہمی پر تفصیلی گفتگو کی۔
ایم این اے انجینئر حمید حسین نے چیف سیکرٹری خیبر پختونخواہ سید شہاب علی شاہ، آئی جی خیبر پختونخواہ ذوالفقار حمید اور دیگر فوجی و سول آفسران کے ہمراہ لوئر کرم صدہ میں منعقدہ جرگے میں بھی شرکت کی۔
اس موقع پر انجینئر حمید حسین نے مرکزی امام جمعہ والجماعت حجت الاسلام فدا حسین مظاہری سے ملاقات کی اور ان کی احوال پرسی اور عیادت بھی کی۔
ضلعی آفس میں عمائدین اور مشیران سے بھی ملاقات اور مسائل پر تفصیلی گفتگو کی۔
آپ کا تبصرہ