اس کٹھن دور میں امام سجاد (ع) کے عطا کردہ اصولوں اور اساسی نقوش سے استفادہ کرنے کی ضرورت ہے

حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے امام چہارم حضرت امام زین العابدین علیہ السلام کے یوم شہادت (25 محرم الحرام95 ھ) پر جاری اپنے پیغام میں کہا: امام علیہ السلام نے اپنے کردار و عمل کے ذریعہ یزیدیت کو بے نقاب کیا اور حسینیت کے خدوخال کو جس طرح واضح کیا یہ انداز باطل قوتوں کے خلاف جدوجہد کرنے والی ہر قوت کے لئے رہنما اصول کی حیثیت رکھتا ہے۔

انہوں نے مزید کہا: حضرت سید الساجدین علیہ السلام نے ولادت سے لے کر کربلا اور کربلا سے لے کر آخری سانس تک انتہائی کٹھن اور سنگین حالات کوبرداشت کر کے عالم انسانیت کے لئے صبر و استقامت کی ایسی بنیادیں فراہم کیں جن سے ہر دور کا انسان استفادہ کر رہا ہے اور حق پر قائم رہتے ہوئے مرنے کا حوصلہ پا رہا ہے۔

علامہ ساجد نقوی نے کہا: امام زین العابدین علیہ السلام نے اذہان و قلوب کو جلا بخشنے، باطن میں روشنی پیدا کرنے، نفس امارہ کو شکست دینے اور خدا کے ساتھ لو لگانے کے لئے دعاؤں اور مناجات کا جو ذخیرہ امت کو فراہم کیا ہے، دور حاضر میں اس سے استفادہ کیا جائے تو دنیوی و اخروی نجات کا سامان فراہم ہو سکتا ہے۔

انہوں نے کہا: اپنی مناجات میں امام زین العابدین علیہ السلام فرماتے ہیں کہ "خدا کی بارگاہ میں دو قطروں کے علاوہ اور کوئی محبوب نہیں۔ ایک راہ خدا میں گرنے والا شہید کے خون کا قطرہ اور دوسرا رات کی تاریکی میں خوف و تقرب الہی کے لئے گرنے والا آنسو کا قطرہ"۔

علامہ ساجد نقوی نے کہا: امام چہارم علیہ السلام کو یہ امتیازی خصوصیت حاصل تھی کہ انہوں نے دعاؤں اور مناجات کے ذریعے انسان کو اپنے خالق سے براہ راست مربوط و مخاطب ہونے کا گر سکھایا اور عبادات کے ذریعے اپنے نفس پر کنٹرول کرنے کی رسم ڈالی۔ آج اگر ہم "صحیفہ کاملہ" کی شکل میں ان مناجات کے ذریعے اپنی زندگیوں میں انقلاب برپا کریں تو ہمیں نہ صرف اپنے نفس پر کنٹرول حاصل ہو گا بلکہ ہم انسانوں کے دلوں پر حکمرانی کے راز سے آشنا ہو جائیں گے اور صبر و حکمت کے ذریعے دنیا کو مسائل و مشکلات سے نجات دلانے میں اہم کردار ادا کر سکیں گے۔

قائد ملت جعفریہ پاکستان نے یہ بات زور دے کر کہی کہ باطل قوتیں عالم اسلام کی دینی، علمی، ثقافتی، تہذیبی روایات اور آزادی و استقلال کو ختم کرنے اور وسائل کو تباہ کرنے کے درپے ہیں لہذا اس کٹھن دور اور سنگین مرحلے میں امام سجاد علیہ السلام کے عطا کردہ اصول اور اساسی نقوش سے استفادہ کرنے کی ضرورت ہے۔