حوزہ نیوز ایجنسی کی رپورٹ کے مطابق، آئی ایس او ملتان پاکستان کے تحت نشتر میڈیکل یونیورسٹی میں سالانہ 53 واں'' یومِ حسین علیہ السّلام'' کا انعقاد کیا گیا، جس میں طلباء وطالبات سمیت اساتذہ اور مہمان شخصیات نے شرکت کی۔
کانفرنس میں علامہ سید شہنشاہ حسین نقوی، یونیورسٹی کی وائس چانسلر ڈاکٹر مہناز خاکوانی، ڈائریکٹر اسٹوڈنٹس افیئر ڈاکٹر سید احمر حسین، پرنسپل الائیڈ ہیلتھ سائنسز ڈاکٹر عبدالستار انجم، پرنسل نرسنگ کالج محترمہ قمر النسا، ہیڈ آف گائنی ڈیپارٹمنٹ ڈاکٹر سیدہ علی، ڈائریکٹر مینیجمنٹ ڈاکٹر عامر اسد، ڈاکٹر سجاد رضا، ڈاکٹر الطاف باقر، ڈاکٹر علی احمد نقوی نے شرکت کی۔
حجت السلام والمسلمین علامہ سید شہنشاہ حسین نقوی نے قیام امام حسین علیہ السلام پر روشنی ڈالتے ہوئے کہا کہ اگر امام حسین علیہ السلام قیام نہ فرماتے تو اسلام کی اجتماعی شکل مسخ ہو جاتی، امام حسین علیہ السلام کے اہلبیت و انصار کی شہادت نے اسلام کو ایک نئی زندگی بخشی، آج کی غزہ کربلا سے مماثلت رکھتی ہے جس میں تمام اسلامی ممالک سوائے ایران و مقاومتی مزاحمت لبنان و مصر اپنی ذمہ داری ادا کرنے میں ناکام رہے ہیں۔
کانفرنس سے خطاب کرتے ہوئے وائس چانسلر پروفیسر ڈاکٹر مہناز خاکوانی کا کہنا تھا کہ کربلا ہمیں حریت و مقاومت کا درس دیتی ہے، کربلا ہمیں یہ پیغام دیتی ہے کہ حالات ہم پر جتنے بھی دشوار ہو جائیں ہمیں تب بھی ظلم کے خلاف اپنی آواز بلند کرنی ہے، غزہ کے موجودہ حالات اور ان کی مزاحمت امام حسین کی کربلا کے درس کے بغیر ممکن نہ تھی، آج مسلمانوں کو چاہیے کہ غزہ کے معاملے میں حسینی کردار ادا کریں اور ان کی ہر ممکنہ مدد کریں۔
کانفرنس میں نشتر یونیورسٹی کے طلبہ و طالبات کی کثیر تعداد نے شرکت کی طلباء و طالبات نے منقبت، قصیدہ اور مرثیہ بھی پیش کیا۔
آپ کا تبصرہ