حوزہ نیوز ایجنسی کی رپورٹ کے مطابق، مجلس وحدت مسلمین پاکستان کے چیف آرگنائزر سید ناصر عباس شیرازی نے میڈیا سیل سے جاری اپنے بیان میں کہا ہے کہ پاکستان بھر سے ہزاروں زائرین ہر سال اربعین کے موقع پر براستہ سڑک ایران و عراق کا سفر کرتے ہیں۔ اس سفری روایت پر اچانک پابندی لگانا نہ صرف عوامی جذبات سے کھلواڑ ہے، بلکہ انتظامی نااہلی کا کھلا ثبوت بھی ہے۔
انہوں نے کہا کہ زائرین کے اربوں روپے جو ویزہ، ٹرانسپورٹ اور دیگر تیاریوں پر خرچ ہو چکے ہیں؛ اس نقصان کا ذمہ دار کون ہو گا؟ مسائل و مشکلات پر قابو پانے کے اقدامات اٹھانے کے بجائے الٹا عوام کو ان کے مذہبی حق سے روک دینا سراسر نااہلی اور ناکامی ہے، اس غیر دانشمندانہ فیصلے سے ریاستی رٹ مزید کمزور ہو گی۔
انہوں نے کہا کہ اب سوال یہ ہے کہ حال ہی میں ایران، عراق اور پاکستان کے سہ ملکی اربعین اجلاس میں پاکستانی حکام کی جانب سے کیے گئے وعدے کہاں گئے؟ کیا وہ صرف کاغذی دعوے تھے؟ اگر حکومت نے سفری سہولیات فراہم کرنے کا وعدہ کیا تھا تو اب پیچھے ہٹنے کا جواز کیا ہے؟ یہ پابندی محض ایک انتظامی فیصلہ نہیں، بلکہ لاکھوں عقیدت مندوں کے جذبات کو ٹھیس پہنچانے کے مترادف ہے۔ ہم واضح کرتے ہیں کہ زائرین کی راہ میں کھڑی کی گئی رکاوٹیں کسی بھی صورت قابلِ قبول نہیں۔
واضح رہے پاکستانی وزیرِ داخلہ نے حالیہ ایران کے دورے میں اعلان کیا تھا کہ بہت جلد زمینی راستے زائرین کے لیے کھولیں گے، تاہم آج اچانک انہوں نے سیکیورٹی کا بہانہ بنا کر اربعین پر جانے والے زائرین کے بائی روڈ سفر پر پابندی عائد کی ہے۔
یاد رہے کہ پاکستانی وزیرِ داخلہ کے اس بیان کے بعد، سوشل میڈیا پر آواز اٹھی ہے اور ان کے اس بیان کی شدید الفاظ میں مذمت کی جا رہی ہے۔
یہ بات بھی قابلِ ذکر ہے کہ زائرین ویزہ اور ٹرانسپورٹ کے مد میں کروڑوں روپے خرچ کر چکے ہیں۔ زائرین سوال کر رہے ہیں کہ ان نقصانات کا ذمہ دار کون ہے؟
آپ کا تبصرہ