حوزہ نیوز ایجنسی کی رپورٹ کے مطابق، جعفریہ سپریم کونسل جموں وکشمیر کے چیئرمین سید زوار حسین نقوی ایڈووکیٹ نے وزارتِ داخلہ پاکستان کی جانب سے زمینی راستے سے اربعین امام حسین علیہ السلام پر جانے والے زائرین پر اچانک پابندی عائد کرکے پاک ایران سرحدی راستے کو بند کیے جانے پر گہری تشویش اور دکھ کا اظہار کیا ہے۔
انہوں نے اپنے بیان میں کہا ہے جب زائرین نے ویزے حاصل کرلیے اور قافلہ سالاروں کو ادائیگیاں کر دیں اور قافلہ سالاروں نے اربعین کے موقع پر عراق اور ایران میں ہوٹلوں کی بکنگ کر لی نیز ٹرانسپورٹ کے انتظامات مکمل کر لیے ایسے میں وزیر داخلہ پاکستان کی جانب سے اچانک بائی روڈ براستہ ایران عراق جانے والے زائرین پر پابندی عائد کرنا سراسر ظلم و زیادتی ہے۔
انہوں نے کہا کہ زائرین کی اکثریت متوسط اور غریب طبقہ سے تعلق رکھتی ہے جو بائی ائیر جانے کی سکت نہیں رکھتی اور اپنے آپ کو تکلیف میں رکھ کر رقم جمع کرکے زیارات پر جانے کے لیے قافلہ سالاروں کو ادائیگیاں کر چکی ہے اور ویزہ فیس بھی بھر چکی ہے اور قافلہ سالار بھی رہائش اور دیگر انتظامات کے لیے عراق اور ایران میں ادائیگیاں کر چکے ہیں۔
انہوں نے مزید کہا کہ وزیر داخلہ کی جانب سے زمینی سرحد بند کرنے اور زائرین کو سفر زیارت سے روکے جانے کے اعلان سے نہ صرف زائرین، زیارتِ امام حسین علیہ السّلام سے محروم ہو چکے ہیں، بلکہ ان کی اور سالار حضرات کی جمع پونجی بھی ڈوب چکی ہے جس کا ازالہ ہونا ناممکن ہے اگر زیارات پر جانے والے زائرین کو بھیجنے میں حکومت پاکستان کو کچھ مشکلات تھیں تو قبل از وقت سرحد کی بندش کا اعلان کیا جانا چاہیے تھا اور یہ پابندی عائد کی جانی چاہیے تھی آخری وقت میں یہ اعلان کرنا سراسر زیادتی ہے اس سے ہزاروں زائرین اور سینکڑوں سالار اپنی جمع پونجی سے محروم ہو جائیں گے۔
انہوں نے وزیر داخلہ پاکستان اور حکومت پاکستان سے پرزور اپیل کی کہ وہ فی الفور اس فیصلہ پر نظر ثانی کرتے ہوئے اپنا فیصلہ واپس لے اور زائرین کے لیے زمینی راستہ کھولے، تاکہ زائرین بروقت اربعین امام حسین علیہ السلام پر کربلا (عراق) پہنچ سکیں۔
آپ کا تبصرہ