حوزہ نیوز ایجنسی کی رپورٹ کے مطابق، امام جمعہ کوئٹہ علامہ غلام حسنین وجدانی کی رہائی کے لیے صوبۂ بلوچستان کے دارالحکومت کوئٹہ میں عوام الناس کی جانب سے احتجاجی مظاہرہ کیا گیا۔ کوئٹہ کے میکانگی روڈ پر واقع مرکزی جامعہ مسجد امام بارگاہ کلاں میں گزشتہ دنوں نمازِ جمعہ کے بعد علمائے کرام اور عوام الناس نے احتجاج کیا۔
اس موقع پر مظاہرین نے حکومت سے مطالبہ کیا کہ سعودی عرب میں گزشتہ تین ماہ سے بے جرم و خطا قید گزارنے والے عالم دین اور امام جمعہ کوئٹہ علامہ غلام حسنین وجدانی کی رہائی میں اپنا کردار ادا کرے۔
مظاہرین کا کہنا تھا کہ پاکستانی حکومت سفارتی سطح پر مسائل حل کرتے ہوئے جلد از جلد علامہ وجدانی کی رہائی کو یقینی بنائے۔
احتجاج میں علمائے کرام کے علاوہ بزرگوں، بچوں اور جوانوں اور عوام الناس کی بڑی تعداد نے شرکت کی۔
واضح رہے علامہ وجدانی عمرے کی ادائیگی کے لیے سعودی عرب روانہ ہوئے تھے، تاہم تین ماہ گزرنے کے بعد بھی ان کی کوئی خبر نہیں کہ وہ کہاں ہیں۔
یاد رہے علامہ وجدانی اتحاد بین المسلمین کے داعی اور ایک انقلابی سوچ رکھنے والے عالم دین ہیں؛ انہوں نے ہمیشہ اپنے خطبات اور تقاریر میں اتحاد قائم زور دیا ہے۔
آپ کا تبصرہ