حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے غزہ کی تازہ ترین صورتحال کو نام نہاد مہذب دنیا کے منہ پر زور دار طمانچہ قرار دیتے ہوئے کہا: غزہ میں المیہ نہ صرف جنم لے چکا بلکہ انسانیت سسک سسک کر آخری دم لے رہی ہے۔
انہوں نے مزید کہا: فرانسیسی صدر کا بیان تحفظات کے باوجود حوصلہ افزا ہے تو دوسری طرف امریکی ردعمل اور مکارانہ طعن و تشنیع سے دنیا پر واضح ہو گیا کہ صیہونی ظلم کی سیاہ رات کے پیچھے یہی مکر کار فرما ہے۔ پاکستان پر ذمہ داری بڑھ چکی کہ امن اور مظلوموں کی حمایت کیلئے اپنا بھرپور کردار ادا کرے۔
علامہ سید ساجد علی نقوی نے کہا: غزہ کی تازہ ترین صورتحال نام نہا د مہذب دنیا کے منہ پر زوردار طمانچہ ہے، انسانی المیہ نہ صرف جنم لے چکا بلکہ اب تو انسانیت سسک سسک کر آخری دم لے رہی ہے، فلسطین میں انسانی معاشرہ کی صورتحال زندہ انسانی قبرستان میں تبدیل ہو چکی ہے۔
انہوں نے کہا: اقوام متحدہ اور انسانی حقوق کی تنظیموں سمیت عوام بے بسی میں چیخ و پکار سے زیادہ کچھ نہیں کر سکے۔ ایسی صورتحال میں فرانسیسی صدر کا بیان بعض تحفظات کے باوجود مظلوم فلسطینیوں کے لئے حوصلہ افزا اور اس حقیقت کا اظہار ہے جو اس وقت فلسطین خصوصاً غزہ کو صیہونی ظلم کے ذریعے درپیش ہے البتہ اس معاملے پر امریکی رد عمل واضح طور پر مکارانہ طعن و تشنیع کے ساتھ واضح طور پر آشکار ہو چکا کہ غزہ سمیت اب تک اسرائیل نے جتنے مظالم ڈھائے ان سب کی پشت پناہی امریکہ کر رہا ہے ، فرانسیسی صدر کے بیان پر ردعمل دراصل اصل موضوع سے ہٹانے کےلئے مکارانہ، عیارانہ ذہنیت کی عکاسی ہے۔
قائد ملت جعفریہ نے کہا: اس صورتحال میں پاکستان کی بطور ایک اسلامی ایٹمی جمہوری ریاست ذمہ داری مزید بڑھ چکی ہے کہ وہ اپنا اثر و رسوخ استعمال کرتے ہوئے غزہ میں ہونیوالے مظالم کو نہ صرف رکوائے بلکہ امریکہ کو اپنی کروڑوں عوام کے جذبات بھی پہنچائے جو ایک لاوے کی شکل اختیار کر چکے ہیں اور سنجیدہ غور نہ کیا گیا تو اس کے گہرے اثرات مرتب ہوں گے۔
آپ کا تبصرہ