حوزہ نیوز ایجنسی کی رپورٹ کے مطابق، لاہور/ چئیرمین عزاداری کونسل پنجاب رہنما شیعہ علماءکونسل قاسم علی قاسمی نے کہا ہے کہ بائی روڈ ایران عراق زیارت جانے پر پابندی کو مسترد کرتے ہیں۔ وفاقی وزیر داخلہ سینیٹر محسن نقوی کے احمقانہ اور بزدلانہ فیصلے نے عوام کے ذہنوں میں کئی سوالات پیدا کر دیے ہیں۔ہم پوچھتے ہیں کیا ریاست اپنے شہریوں کو سکیورٹی فراہم کرنے میں ناکام ہوگئی ہے یا کسی بیرونی ایجنڈے کو تقویت دی جارہی ہے۔ یا یہ تاثر دینے کی کوشش کی جارہی ہے کہ وطن عزیز پاکستان کے وہ محافظ جن کی صلاحیت اور بہادری کے چرچے پوری دنیا میں ہیں،وہ اپنے ہی ملک کے کچھ علاقوں میں بے بس ہیں؟
ہم ایسے کسی بھی تاثر کو تسلیم کرنے کے لئے تیار نہیں۔ ہم سمجھتے ہیں کہ بائی روڈسفر پر پابندی لگانے کا مقصد بھارتی ایجنڈے کو تسلیم کرنا اور دہشت گردوں کے سامنے سرنڈر کرکے بزدلی دکھانے کے مترادف ہے۔ عوام یہ بھی پوچھنے کا حق رکھتے ہیں کہ کیاپی آئی اے کا کاروبار چمکانے کے لئے متوسط طبقے کیلئے زیارت کو نا ممکن بنایا جا رہا ہے؟
قائد ملت جعفریہ علامہ سید ساجد علی نقوی پہلے بھی اعلان کرچکے ہیں کہ آئمہ معصومین کے مزارات پر جانے کا زمینی راستہ کبھی نہیں چھوڑیں گے۔ قربانیاں پہلے بھی دیتے رہے ہیں اور آئندہ بھی اس سے گریز نہیں کریں گے۔ ہماری وزیر اعظم شہباز شریف، آرمی چیف فیلڈ مارشل سید عاصم منیر سے گذارش ہے کہ زائرین پر پابندی کو واپس لیا جائے۔
آپ کا تبصرہ