حزب اللہ کا اہم اسلحہ؛ ایمان اور تقویٰ: امام جمعہ لکھنؤ

حوزہ نیوز ایجنسی کی رپورٹ کے مطابق، لکھنؤ شاہی اصفی مسجد میں مولانا سید رضا حیدر زیدی نے نمازیوں کو تقوائے الٰہی کی نصیحت کرتے ہوئے کہا کہ میں اپنے آپ کو اور آپ تمام حضرات کو تقوائے الٰہی اختیار کرنے کی نصیحت اور وصیت کر رہا ہوں، تقویٰ یعنی اللہ سے ڈرنا، واجبات پر عمل کرنا، حرام کام سے بچنا، یہ ہے تقوی کی ابتدا، کمالِ تقویٰ یہ ہے کہ انسان مکروہات سے بھی پرہیز کرے، مستحبات پر بھی عمل کرے اور معراج تقوی یہ ہے کہ جو مشکوک چیزیں ہیں ان سے بھی اجتناب کریں۔ تقوی کا مقصد یہ ہے کہ انسان کے ذہن میں ہمیشہ یہ خیال رہے کہ اللہ تبارک و تعالی کی ذات ہمیں دیکھ رہی ہے۔ ہم تنہائی میں ہوں، مجمع میں ہوں، رات کے اندھیرے میں ہوں، دن کے اجالے میں ہوں، کسی بھی حال میں ہوں ہمیں اللہ دیکھ رہا ہے، اسی کی بارگاہ میں جانا ہے اور حساب و کتاب دینا ہے۔

مولانا سید رضا حیدر زیدی نے حضرت زینب کبریٰ سلام اللہ علیہا کے خطبہ کے فقرات کو بیان کرتے ہوئے کہا کہ بلا تفریق مذہب ملت، بلا تفریق رنگ و نسل ہر سچا انسان امام حسین علیہ السلام کو سلام کرتا ہے اور یزید پر لعنت کرتا ہے۔

امام حسن عسکری علیہ السلام کی حدیث بیان کرتے ہوئے مولانا سید رضا حیدر زیدی نے کہا کہ زیارت اربعین مومن کی ایک علامت ہے۔ روایات کے مطابق اسی دن اسیران اہل حرم کربلا پہنچے ہیں، اسی دن شہدائے کربلا علیہم السلام کے سر ان کے جسموں سے ملحق ہوئے یعنی کربلا میں دفن ہوئے۔

مولانا سید رضا حیدر زیدی نے عراق میں عراقی فورسز کے ذریعے داعش کے دہشت گردوں کی گرفتاری کا ذکر کرتے ہوئے کہا کہ یہ دہشت گرد نجف اشرف سے کربلا معلیٰ کے درمیان مشی کے راستے میں حملہ اور دھماکہ کرنے والے تھے، لیکن عراقی فورس اور پولیس نے اپنی حکمت سے انہیں گرفتار کر لیا اور یہ بھی اطلاع ہے کہ ان دہشت گردوں کا تعلق اسرائیل سے تھا۔

مولانا سید رضا حیدر زیدی نے مزید کہا کہ جب تک اسرائیل ہے تب تک دنیا میں امن قائم نہیں ہو سکتا، اسرائیل غزہ میں لوگوں کو بھوکا قتل کر رہا ہے۔ جس پر مسلم ممالک کے حکمرانوں کی خاموشی حیرت انگیز اور قابل مذمت ہے۔

مولانا سید رضا حیدر زیدی نے اسرائیل کے جرائم کو بیان کرتے ہوئے کہا کہ اسرائیل جعلی اور نقلی قبریں بنا رہا ہے، 1978 سے لے کر اب تک اسرائیل نے 13000 سے زیادہ جعلی اور نقلی قبریں بنائی ہیں، تاکہ ثابت کر سکے کہ یہ علاقہ ان کا ہے اور ان جعلی قبروں پر اسرائیل 55000000 ڈالر سے زیادہ خرچ کر چکا ہے۔

مولانا سید رضا حیدر زیدی نے انہدام جنت البقیع کی جانب اشارہ کرتے ہوئے کہا کہ مسلمان اسرائیل سے سبق لے کہ وہ جعلی قبریں بنا رہے ہیں تاکہ ثابت کریں کہ وہ قدیمی ہیں تو تم اپنی اصل اور حقیقی قبروں کو کیوں مسمار کر رہے ہو؟ انہیں کیوں نہیں تعمیر کرتے؟

مولانا سید رضا حیدر زیدی نے ایک سنی عالم کی ڈائری کا ذکر کرتے ہوئے کہا کہ جنت البقیع سمیت دیگر تمام منہدم قبریں جہاں مقدس روضے ہیں وہیں آثار قدیمہ یعنی وہ قدیم اسلامی آثار ہیں۔

لبنانی حکومت کے ذریعے حزب اللہ کے خلع سلاح کا ذکر کرتے ہوئے مولانا سید رضا حیدر زیدی نے کہا کہ خدانخواستہ اگر ایسا ہوتا ہے تو بہت بڑا نقصان پہنچے گا، لیکن ہم نا امید نہیں ہیں، کیونکہ ہمارا دشمن احمق ہے وہ ہمیں اب تک سمجھ ہی نہیں سکا ہے۔ وہ سمجھ رہا ہے حزب اللہ کا اسلحہ میزائل وغیرہ ہیں، جبکہ حزب اللہ کا اہم اسلحہ ان کا ایمان اور ان کا تقویٰ ہے۔

مولانا سید رضا حیدر زیدی نے مزید کہا کہ لوگ حقائق سے ناواقف ہیں، پروپگنڈے کا شکار ہیں لہٰذا ان کو حقائق سے آگاہ کرنا سب کی ذمہ داری ہے۔