حوزہ نیوز ایجنسی کی رپورٹ کے مطابق، مولانا سید روح ظفر رضوی نے نمازِ جمعہ کے خطبوں میں نمازیوں کو تقوائے الٰہی کی نصیحت کرتے ہوئے کہا کہ تقوائے الٰہی ہماری اولین ذمہ داری ہے۔ یقینا ہر وہ انسان جو تقوی کے ساتھ زندگی گزارتا ہے اس دنیا میں وہ کبھی ایسی مشکلات اور پریشانیوں میں گرفتار نہیں ہوتا کہ جس سے نکل نہ پائے، کیونکہ خداوند عالم نے قرآن مجید میں یہ اعلان کیا ہے کہ جو تقویٰ اختیار کرے گا خدا اس کے لئے راستے ہموار کرے گا۔
مولانا سید روح ظفر رضوی نے نا امیدی اور مایوسی کے نقصانات بیان کرتے ہوئے کہا کہ قرآن کریم اور احادیث معصومین علیہم السلام کی روشنی میں نا امیدی اور مایوسی کفر ہے، مایوسی بدترین گناہ ہے، نابودی کا پیش خیمہ ہے۔ مایوسی آگ ہے جو جلا دیتی ہے۔
مولانا سید روح ظفر رضوی نے دعائے کمیل کے فقرہ "اِرْحَمْ مَنْ رَأْسُ مَالِهِ الرَّجَاءُ" یعنی خدایا! تجھ پر امید ہی جس کا کل سرمایہ ہو اس پر رحم فرما، کو بیان کرتے ہوئے کہا کہ ہم مولا علی علیہ السلام پر ایمان رکھتے ہیں، لہٰذا ان کے فرمان پر عمل کریں اور یقین کر لیں کہ ہمارا کل سرمایہ امید ہے نا امیدی نہیں ہے۔
مولانا سید روح ظفر رضوی نے کہا کہ ایام عزا ہیں؛ کوشش کریں کہ وہ کام کریں جس سے ہم اہل بیت علیہم السلام سے قریب ہوں، ایسے کام انجام نہ دیں کہ جس سے ہم اہل بیت علیہم السلام سے دور ہو جائیں۔
مولانا سید ظفر رضوی نے مومنین سے اپیل کرتے ہوئے کہا کہ ایسی ویڈیوز کو سوشل میڈیا پر شیئر کرنے اور دوسروں کو فارورڈ کرنے سے پرہیز کریں جس سے قوم کی بدنامی ہوتی ہے، بلکہ جو بھیج رہے ہیں ان کو بھی منع کریں، جن کی ویڈیو ہو ان سے گفتگو کریں کہ آئندہ ایسا نہ کریں۔ ہم خود سبب نہ بنیں اس بری بات یا اس برے کام کو پھیلانے کا۔
مولانا سید روح ظفر رضوی نے امام حسین علیہ السلام کی حدیث "میرے جیسا اس (یزید) جیسے کی بیعت نہیں کر سکتا۔" کو بیان کرتے ہوئے کہا کہ یعنی قیامت تک حسین علیہ السلام یزید کی بیعت نہیں کر سکتے، کوئی حسینی کسی یزید کی بیعت نہیں کر سکتا۔ آج غزہ میں جن کو بھوکا مارا جا رہا ہے ان کے خلاف صدائے احتجاج بلند کریں، ظالم سے اظہار برائت کریں۔ ایک سال سے زیادہ عرصے تک ان لوگوں کو اسلحوں سے مارا گیا اور اب ادھر چند ماہ سے بھوک سے مارا جا رہا ہے۔ کہاں ہیں انسانی حقوق کا نعرہ لگانے والی عالمی تنظیمیں؟ آخر کیوں خاموش ہیں؟
مولانا سید روح ظفر رضوی نے عزاداری کے سلسلے میں کہا کہ ہم لوگوں کو دکھانے کے لئے کام نہ کریں، بلکہ صرف مولا کو دکھانے کے لئے کام کریں۔
آپ کا تبصرہ