حوزہ نیوز ایجنسی کے مطابق، پاکستان کے شہر جنڈ میں واقع دینی درسگاہ جامعہ جعفریہ جنڈ میں مدرسہ ہذا کا سالانہ اجتماع بعنوان نہج البلاغہ کانفرنس جاری ہے۔ جس میں علاقہ بھر کے علماء و مومنین مختلف علماء و خطباء کے بیانات سے مستفید ہو رہے ہیں۔
نہج البلاغہ کانفرنس کے پہلے سیشن سے ملک بھر سے تشریف لائے متعدد خطباء نے خطاب کیا اور نہج البلاغہ کے موضوع پر گفتگو کی۔
ان خطباء میں سرپرست مرکز افکار اسلامی مولانا مقبول حسین علوی صاحب انگلینڈ، وکیل مرجعیت علامہ شیخ انور علی نجفی صاحب اسلام آباد، مولانا انیس الحسنین خان صاحب اسلام آباد، مولانا لیاقت علی اعوان صاحب (نظامت کے فرائض)، مولانا سید سعید ہمدانی صاحب، مولانا اقبال حسین مقصود پوری صاحب، مولانا سید علی رضا نقوی صاحب لاہور سمیت دیگر علماء کرام شامل ہیں۔
پہلے سیشن کے اختتام پر جامعہ جعفریہ کے فارغ التحصیل طلبہ کی بزرگ علماء دین کے ہاتھوں عمامہ پوشی بھی کی گئی۔
یاد رہے کہ یہ پروگرام جامعہ جعفریہ جنڈ، اٹک کے مرحوم پرنسپل جامعہ جعفریہ و جامعہ زینبیہ جنڈ قبلہ سید رضی عباس ہمدانی اعلی اللہ مقامہ کے ایصال ثواب کے لئے بھی منعقد کیا جا رہا ہے۔ جس میں اس عالم بزرگوار کو خراجِ تحسین پیش کرنے کے لئے ضلع اٹک اور دور دراز علاقوں سے مومنین کی بڑی تعداد کے ساتھ ساتھ درجنوں علماء کرام بھی اس کانفرنس میں شرکت کر رہے ہیں۔ کانفرنس اور جامعہ کے تعلیمی امور کو سراہتے ہوئے آئندہ تبلیغی امور بالخصوص قرآن مجید و نہج البلاغہ کی ترویج میں اپنی مشارکت کی یقین دہانی کرا رہے ہیں۔
قابل ذکر ہے کہ اس کانفرنس میں خواتین بھی بھرپور شرکت کر رہی ہیں۔ جامعہ زینبیہ (س) کی معلمات و طالبات خواتین کے پنڈال میں نظم و نسق و پزیرائی کےامور کو بخوبی انجام دے رہی ہیں۔
آپ کا تبصرہ