حوزہ نیوز ایجنسی کی رپورٹ کے مطابق، جنگ بندی کی کھلی خلاف ورزی کرتے ہوئے غاصب صیہونی فوجیوں نے آج جنوبی لبنان پر فضائی جارحیت کی؛ جس کے نتیجے میں 13 افراد شہید، جبکہ متعدد زخمی ہوئے۔
رپورٹ کے مطابق، جنگی جنون میں مبتلا اسرائیل باز نہ آیا، جنگ بندی معاہدے کی خلاف ورزی کرتے ہوئے آج پھر لبنان پر حملہ کردیا، جس کے نتیجے میں 13 افراد شہید ہوگئے۔
لبنانی وزارتِ صحت نے تصدیق کی کہ غاصب اسرائیلی فوج نے جنوبی علاقے صیدون میں فضائی حملہ کیا، اسرائیل کی جانب سے پناہ گزینوں کے زیر استعمال اوپن اسپورٹس گراؤنڈ کو نشانہ بنایا گیا، حملے میں 13 افراد شہید اور متعدد زخمی ہوگئے۔
غاصب اسرائیلی فوج نے دعویٰ کیا کہ انہوں نے جس مقام کو نشانہ بنایا، وہاں حماس کے ارکان موجود تھے جو اسرائیل کے خلاف کارروائیوں کی تیاری کر رہے تھے، تاہم اسرائیلی فوج نے اس دعوے کا کوئی ثبوت پیش نہیں کیا ہے۔
فلسطینی مزاحمتی تحریک حماس نے غاصب اسرائیلی دعوے کو مسترد کرتے ہوئے اسے بے بنیاد قرار دے دیا ہے۔
حماس نے واضح کیا ہے کہ غاصب اسرائیل نے پناہ گزینوں کے زیر استعمال اوپن اسپورٹس گراؤنڈ کو نشانہ بنایا ہے۔
یاد رہے کہ گزشتہ سال غاصب اسرائیل اور لبنان کے درمیان جنگ بندی معاہدہ طے پایا تھا، تاہم اس معاہدے کے باوجود اسرائیلی فوج کی جانب سے لبنان پر حملوں کا سلسلہ جاری ہے۔
واضح رہے غاصب اسرائیلی فوج نے رواں ماہ کے آغاز میں بھی لبنان کے جنوبی علاقے میں کار پر ڈرون حملہ کیا تھا، جس کے نتیجے میں 4 افراد شہید ہوگئے تھے۔
آپ کا تبصرہ