حوزہ نیوز ایجنسی کی رپورٹ کے مطابق، حزب الله لبنان نے جنوبی بیروت کے علاقے میں غاصب صیہونی جارحیت کے نتیجے میں تنظیم کے سینئر کمانڈر ہیثم علی طباطبائی کی شہادت کی تصدیق کرتے ہوئے ایک بیان جاری کیا ہے۔
حزب الله کے بیان کا متن مندرجہ ذیل ہے:
بسم الله الرحمن الرحیم
مِّنَ الْمُؤْمِنِینَ رِجَالٌ صَدَقُوا مَا عَاهَدُوا اللَّهَ عَلَیْهِ ۖ فَمِنْهُم مَّن قَضَیٰ نَحْبَهُ وَمِنْهُم مَّن یَنتَظِرُ ۖ وَمَا بَدَّلُوا تَبْدِیلًا.
إنا لله وإنا إليه راجعون
حزب الله فخر کے ساتھ اعلان کرتی ہے کہ مزاحمتی تحریک کے سینئر کمانڈر ہیثم علی طباطبائی المعروف سید ابو علی شہید ہوگئے ہیں۔
انہوں نے لبنان کے دفاع کی راہ میں جانثاری سے کام لیا اور اسرائیلی دشمن کے خائنانہ حملے میں شہید ہوئے۔
انہوں نے اپنی پوری زندگی جدوجہد، اخلاص، قربانی اور ثابت قدمی کے ساتھ مقاومت کی راہ میں گزاری۔ وہ دشمن صیہونی حکومت کے مقابلے میں آخری لمحے تک متحرک رہے اور اپنے شہید ساتھیوں سے جاملے۔
شہید ہیثم طباطبائی نے مقاومت کے آغاز ہی سے اپنی زندگی اس تحریک کے لیے وقف کر دی تھی۔
وہ تنظیم کے بانی رہنماؤں میں سے تھے جنہوں نے اس تنظیم کو مضبوط، باوقار اور طاقتور بنایا، تاکہ وطن محفوظ رہے۔
انہوں نے دفاع وطن میں نہ کبھی تھکن محسوس کی اور نہ کبھی ہمت ہاری۔
انتھک کوشش اور خدمات کے بدلے الله تعالٰی نے انہیں شہادت کا بلند مقام عطا کیا۔ ان کی یہ عظیم قربانی مقاومتی مجاہدین کے لیے مزید عزم، حوصلے اور طاقت کا سبب بنے گی، جیسے وہ اپنی پوری زندگی ان کے لیے توانائی کا ذریعہ رہے۔ مجاہدین ان کے راستے کو آگے بڑھائیں گے۔
حزب الله اس عظیم مجاہد کمانڈر کی شہادت کی مناسبت سے امام زمانہ (عج)، تمام مقاومتی مجاہدین اور صابر اور ثابت قدم عوام اور شہید کے اہل خانہ کو تسلیت اور مبارک باد پیش کرتی ہے اور الله تعالٰی سے ان کے اہل خانہ کے لیے صبر جمیل اور زخمیوں کی جلد شفا کے لیے دعاگو ہے۔
آپ کا تبصرہ