حوزہ نیوز ایجنسی کی رپورٹ کے مطابق، ایرانی قومی سلامتی کونسل کے سیکریٹری ڈاکٹر علی لاریجانی نے اعلان کیا کہ صدر کے حکم پر سپریم نیشنل سکیورٹی کونسل ایران اور پاکستان کے درمیان اقتصادی رکاوٹوں کو دور کرے گی۔
انہوں نے مزید کہا: ایران پاکستان کے ہمسایہ ممالک کے ساتھ مسائل حل کرنے کے لیے تیار ہے۔ ہم اسلام آباد کو "وائٹ کارڈ" دینے کو تیار ہیں تاکہ جب بھی ضرورت ہو وہ اسے استعمال کر سکیں۔
ایرانی سپریم نیشنل سکیورٹی کونسل کے سیکرٹری علی لاریجانی نے کہا: پاکستان اور افغانستان کے درمیان اختلافات ہمارے لیے باعث تشویش ہیں، اختلافات کے حل کے لیے ہر راستہ اختیار کریں گے، جب بھی پاکستان کہے گا، تعاون کریں گے۔
اسلام آباد میں پریس کانفرنس کرتے ہوئے علی لاریجانی نےکہا: فیلڈ مارشل عاصم منیر کے ساتھ ملاقات میں پاک ایران اسٹریٹجک شراکت داری پر تفصیلی بات ہوئی ہے، وقت آ گیا ہے کہ پاکستان اور ایران بھی اپنے باہمی حالات اور ضروریات کے مطابق ایک مخصوص اور جامع اسٹریٹجک فریم ورک طے کریں۔
انہوں نے کہا: پاکستان اورایران میں انٹیلی جینس شیئرنگ باہمی تعاون کا حصہ ہے، اگر کہا گیا تو پاکستان اور افغانستان کے درمیان مثبت کردار ادا کرنےکو تیار ہیں۔
ڈاکٹر علی لاریجانی نے کہا: ایران پاکستان گیس پائپ لائن معاہدے کی اپنی ذمہ داریاں پوری کرچکا، اگر رکاوٹیں نہ ہوتیں تو آج پاکستانی گھرانے ایرانی گیس استعمال کر رہے ہوتے۔ امید ہے کہ گیس پائپ لائن کے معاملےکا جلد حل نکل آئے گا۔
ایرانی سپریم نیشنل سکیورٹی کونسل کے سیکرٹری نے کہا: پاکستان نے امریکا سے اچھےتعلقات کے باوجود ہماری حمایت کی، اس کو قدر کی نگاہ سے دیکھتے ہیں، پاکستان کا غزہ میں کسی فورس میں شمولیت کا فیصلہ خود پاکستان پر منحصر ہے، بین الاقوامی امن فورس جیسے حل دیرپا نہیں ہوتے اور مزید مشکلات پیدا کرسکتے ہیں۔
انہوں نے کہا: دہشت گرد گروہ دونوں ممالک کے لیے مشترکہ چیلنج ہیں، خطے میں پائیدار امن کے لیے سرحد پار دہشت گردی کے خلاف مشترکہ اور فیصلہ کن کارروائی ناگزیر ہے، داعش کو مغربی ممالک نے بنایا تھا، مختلف دہشت گرد گروپوں کو مختلف انٹیلی جینس ایجنسیوں کی حمایت حاصل ہے۔
قابل ذکر ہے کہ ڈاکٹر علی لاریجانی کے دورہ پاکستان کے دوران، ایران اور پاکستان نے بارٹر تجارت میں تیزی لانے اور تجارتی رکاوٹوں کو دور کرنے پر اتفاق کیا ہے۔ دونوں فریقوں نے دہشت گردی سے سنجیدگی سے نمٹنے پر بھی زور دیا۔
آپ کا تبصرہ