حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی کی زیر سرپرستی شیعہ علماء کونسل پاکستان وسطی پنجاب کی صوبائی مجلس عاملہ کا اجلاس منعقد ہوا۔ جس کی صدارت صوبائی صدر سید ساجد حسین نقوی نے کی۔
اجلاس میں مرکزی سیکرٹری جنرل علامہ ڈاکٹر شبیر حسن میثمی مہمان خصوصی تھے جبکہ اس موقع پر مرکزی ڈپٹی سیکرٹری جنرل سید مصور نقوی اور مرکزی سیکرٹری اطلاعات زاہد علی آخونزادہ بھی موجود تھے۔
اجلاس کے آغاز سے قبل ممتاز اہلسنت عالم دین حضرت مفتی صداقت علی فریدی نے شرکائے اجلاس سے مختصرخطاب کرتے ہوئے اتحاد امت کے لیے فقہائے اسلام کے علماء و زعماء کو عوامی سطح پر حقائق و اخلاص کے ساتھ معاشرے میں کردار ادا کرنے کی ضرورت پر زور دیا۔
انہوں نے کہا: امت مسلمہ سرور عالم محبوب خدا ختم الانبیاء حضرت محمد مصطفی صلی اللہ علیہ وآلہ وسلم کی حدیث ثقلین پر عمل پیرا ہو کر دنیا اور آخرت میں سرخرو ہو سکتی ہے۔
بعد ازاں منعقدہ اجلاس میں وسطی پنجاب میں تنظیمی کارکردگی اور صوبائی مسائل پر اراکین مجلس عاملہ نے گفتگو کی۔
اجلاس کے آخر میں وسطی پنجاب کے جانب سے سیلاب زدگان کی لیے بہترین خدمات کو سراہاتے ہوئے مرکزی سیکرٹری جنرل علامہ ڈاکٹر شبیر حسن میثمی، مرکزی نائب صدر علامہ مظہر عباس علوی اور مرکزی ڈپٹی سیکرٹری جنرل سید مصور نقوی کو یادگاری شیلڈ بھی پیش کی گئی جبکہ بہترین کارکردگی پر صوبائی صدر سید ساجد حسین نقوی اور جنرل سیکرٹری سید صفی الحسنین شیرازی کو بھی یادگاری شیلڈز دیں گئیں۔
آپ کا تبصرہ