حوزہ نیوز ایجنسی کی رپورٹ کے مطابق، اسلامک ریلیف پاکستان کے تحت وزارتِ مذہبی امور و بین المذاہب ہم آہنگی اور یونیسف کے تعاون سے بچوں کے حقوق کے موضوع پر ایک اہم بین المذاہب مکالمہ کی تقریب اسلام آباد میں منعقد ہوئی؛ تقریب کے مہمانِ خصوصی سیکریٹری وزارتِ مذہبی امور جناب ڈاکٹر سید عطا الرحمان شاہ تھے۔
پروگرام کے آغاز میں اسلامک ریلیف پاکستان کے ذمہ داران نے کہا کہ اس پروگرام کا مقصد مذہبی تعلیمات کی روشنی میں بچوں کے تحفظ، ان کے حقوق بارے شعور و آگاہی کے لیے مشترکہ بیانیہ تشکیل دینا اور معاشرے میں بچوں کے ساتھ ہونے والی ناانصافیوں کے خلاف آواز بلند کرنا ہے۔
تقریب کا اہم پروگرام اس موضوع پر پینل ڈسکشن کا تھا جس میں معروف مذہبی رہنماؤں اور مختلف مذاہب کے نمائندگان کی شرکت کی، جن میں علامہ عارف حسین واحدی، علامہ ڈاکٹر مفتی راغب حسین نعیمی، ڈاکٹر سیما فرزاد، سردار ھومی سنگھ، مسٹر کرسٹوفر شرف اور پنڈت رکیش چند راجپوت شامل تھے۔
پینل کے ممبران نے بچوں کے حقوق اور معاشرے میں ناروا سلوک پر تفصیلی گفتگو کی۔
نیشنل رحمۃ للعالمین و خاتم النبیین اتھارٹی کے ممبر اور شیعہ علماء کونسل کے مرکزی نائب صدر علامہ عارف حسین واحدی نے قرآن و حدیث کی روشنی میں بچوں کے حقوق پر تفصیلی گفتگو کرتے ہوئے کہا کہ قرآن مجید اور سیرتِ رسول اکرم میں بچوں کے احترام، تعلیم و تربیت اور تحفظ کو خصوصی مقام حاصل ہے۔ کم عمری میں مزدوری کروانا، بھٹوں یا ورکشاپوں میں کام کروانا، یا گھروں میں ملازمت پر لگانا تعلیم و تربیت سے دوری، بچوں پر جسمانی اور جنسی تشدد اسلامی تعلیمات کے خلاف اور قابلِ مذمت ہے۔
علامہ واحدی نے مزید کہا کہ بچے قوم کا مستقبل، معاشرے کا قیمتی سرمایہ اور انسانیت کا روشن چراغ ہیں؛ ان کا تحفظ سب سے پہلے ریاست کی ذمہ داری ہے اس کے بعد معاشرے کے تمام طبقات نے اپنا کردار ادا کرنا ہے خاصکر محراب و منبر معاشرے کی اصلاح کا مؤثر ذریعہ ہیں، اس لیے علمائے کرام، مشائخ عظام اپنے خطابات، جمعہ کے خطبوں اور مجالس میں بچوں کے حقوق اور ان کے تحفظ کے بارے میں شعور بیدار کرنے میں اپنا اہم کردار ضرور ادا کریں۔
اختتام پر علامہ عارف حسین واحدی نے اسلامک ریلیف پاکستان کے اس اقدام کو سراہتے ہوئے کہا کہ اسلامک ریلیف نے بچوں کے حقوق کے حوالے سے جو مثبت قدم اٹھایا ہے وہ لائقِ تحسین ہے۔ ہم پہلے بھی ان کے ساتھ تعاون کرتے رہے ہیں اور آئندہ بھی ہر ممکن تعاون جاری رکھیں گے۔
پروگرام کے آخر میں مہمان خصوصی جناب ڈاکٹر سید عطا الرحمان شاہ صاحب نے موضوع پر اھم خطاب کیا تمام شرکاء نے اس بات پر زور دیا کہ بچوں کے حقوق کے تحفظ کے لیے اجتماعی اور مسلسل کوششیں ناگزیر ہیں۔
آپ کا تبصرہ