حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے شیعہ علما کونسل شمالی پنجاب کے صوبائی صدر علامہ اشتیاق حسین کاظمی، صوبائی ڈپٹی جنرل سکٹریری ذاکر سید عمران حیدر بخاری (گڈو شاہ)، صوبائی سکٹریری اطلاعات مرید کاظم جعفری اور صوبائی معاون امید علی علوی سے ملاقات کے دوران کہا: موجودہ بین الاقوامی بالخصوص امت مسلمہ کو درپیش چیلنجز کے پیشِ نظر اتحاد و وحدت کیلئے کوششیں جاری رہنی چاہئیں اور سوشل میڈیا و عوامی پلیٹ فارمز پر باہمی اختلافات سے گریز و اجتناب اور اخلاقی قدروں کی پاسداری انتہائی ضروری ہے۔
اس موقع پر شیعہ علما کونسل شمالی پنجاب کے صوبائی صدر علامہ اشتیاق حسین کاظمی نے موجودہ حالات کے تناظر میں اتحاد بین المومنین، مذہبی و تنظیمی حوالوں سے قائد ملت جعفریہ پاکستان کو مفصل رپورٹ پیش کی۔ جس پر علامہ ساجد نقوی نے وفد کی رہنمائی کی۔
علامہ ساجد نقوی نے مزید کہا: وقت کا اہم تقاضا ہے کہ علماء و ذاکرین اتحاد و وحدت، احترام و رواداری، تحمل و برداشت اور ہم آواز ہو کر عزاداریٔ سید الشہداء (س)، سیرت و اخلاق اہلبیت علیہم السلام کے فروغ و تحفظ کیلئے حسبِ سابق اپنا مثبت و مؤثر کردار ادا کریں۔
قائد محترم نے صوبائی صدر و کابینہ کے ارکان کو ہدایت کی کہ ماحول و صورتحال کو سازگار بنانے کیلئے فوری طور پر مثبت، مؤثر و عملی اقدامات کریں۔
آپ کا تبصرہ