۱۷ آذر ۱۴۰۱ |۱۴ جمادی‌الاول ۱۴۴۴ | Dec 8, 2022
نشست

حوزہ/ اعلامیہ میں کہا گیا کہ عوام الناس کی جان اور صحت کی حفاظت مقاصد دین و شریعت میں سے ایک مقصد ہے۔ کورونا ایک وبائی مرض ہے، جس کی روک تھام اور علاج معالجہ کا اہتمام کرنا صرف شریعت کا تقاضا ہی نہیں بلکہ حکم ہے۔ ماہرین کورونا کی مستقل روک تھام کیلئے ویکسین لگوانے پر زور دے رہے ہیں۔

حوزہ نیوز ایجنسی کی رپورٹ کے مطابق،اسلام آباد/صدر مملکت پاکستان ڈاکٹر عارف علوی کے زیر صدارت علماء کرام کا اجلاس اسلام آباد میں ہوا۔ اجلاس میں وزیر مذہبی امور پیر نور الحق قادری، علامہ عارف واحدی، علامہ امین شہیدی، سید ثاقب اکبر نقوی، علامہ طاہر اشرفی، قبلہ ایاز سمیت ملک بھر کے جید علماء کرام، مشائخ عظام کی کورونا ویکسین کے حوالے سے اہم ترین نشست میں شرکت کی، جبکہ چاروں صوبوں، آزاد کشمیر اور گلگت بلتستان کے علماء نے بذریعہ ویڈیو لنک شرکت کی۔

علماء کرام نے کورونا ویکسین کے حوالے سے مشترکہ اعلامیہ جاری کیا، جس کے مطابق پاکستان میں کورونا رجسٹرڈ ویکسینز کے اجزاء ترکیبی پر علماء و مشائخ نے اطمینان کا اظہار کیا اور ویکسین لگوانے پر عوام الناس کو ترغیب دلانے کے لئے علماء و مشائخ مساجد، امام بارگاہوں، خانقاہوں اور مدارس سے موثر اور مثبت آواز بلند کریں گے۔

اعلامیہ میں کہا گیا کہ عوام الناس کی جان اور صحت کی حفاظت مقاصد دین و شریعت میں سے ایک مقصد ہے۔ کورونا ایک وبائی مرض ہے، جس کی روک تھام اور علاج معالجہ کا اہتمام کرنا صرف شریعت کا تقاضا ہی نہیں بلکہ حکم ہے۔ ماہرین کورونا کی مستقل روک تھام کیلئے ویکسین لگوانے پر زور دے رہے ہیں۔

علماء و مشائخ بھی صحت کے ماہرین کی رائے کو اہمیت دیتے ہیں۔ کورونا ویکسین کے استعمال کی ترغیب علماء کرام اور مشائخ عظام کے فرائض منصبی میں سے ہے۔ علمائے کرام منبر و محراب سے جمعہ کو ویکسین لگوانے کی خصوصی تلقین کریں گے نیز علماء اعلانات کا یہ سلسلہ آئندہ کے خطبات میں بھی جاری رکھیں گے۔

لیبلز

تبصرہ ارسال

You are replying to: .
2 + 0 =