حوزہ نیوز ایجنسی کی رپورٹ کے مطابق، حرم حضرت علی ابن موسیٰ الرضا علیہما السّلام میں ہندوستان اور پاکستان کے 600 سے زائد زائرین کی موجودگی میں، شہدائے خدمت کی یاد میں مجلسِ ترحیم اور تکریم منعقد ہوئی، جس سے علامہ حسن ظفر نقوی نے خطاب کیا۔

مجلس ترحیم کا آغاز تلاوتِ کلامِ الٰہی سے ہوا، جس کی سعادت حرم امام رضا (ع) کے قارئ قرآن جناب احمد زادہ نے حاصل کی۔

حجت الاسلام والمسلمین سید حسن ظفر نقوی نے شہدائے خدمت بالخصوص شہید آیت اللہ سید ابراہیم رئیسی کی شخصیت اور زندگی پر روشنی ڈالتے ہوئے کہا کہ اس دلخراش اور المناک واقعہ کی وجہ سے پوری امت مسلمہ غمزدہ اور سوگوار ہے۔

انہوں نے کہا کہ اس دردناک اور المناک واقعہ کے بعد مختلف ممالک کے سربراہان کی جانب سے اظہار افسوس کیا گیا اور تعزیتی پیغام بھیجے گئے، اس کے علاؤہ مختلف ممالک میں شہدائے خدمت کے درجات کی بلندی کے لئے مجالس ترحیم کا بھی انعقاد کیا گیا، یہ سب ان شہداء سے محبت و عقیدت کا اظہار ہے۔

حجت الاسلام حسن ظفر نقوی نے کہا کہ آج ایران ایک عالمی طاقت بن چکا ہے، جس کی وجہ سے خطے میں طاقت و اقتدار کے حوالے سے کافی تبدیلیاں آئی ہیں جو کہ ’’وعدہ صادق‘‘ آپریشن کے بعد مزید نمایاں ہوئی ہیں۔

شہدائے خدمت کی یاد میں منعقدہ مجلسِ تکریم و ترحیم کے اختتام پر سید سجاد حسین موسوی نے نوحہ خوانی کی۔