حوزہ نیوز ایجنسی کی رپورٹ کے مطابق، انقلابِ اسلامی کی 46 ویں سالگرہ کی مناسبت سے حجت الاسلام احمدی نے کہا کہ انقلابِ اسلامی سے پہلے آمرانہ حکومت اور جابرانہ قوانین نے قوم کی روح، جان اور زندگی پر اپنا منحوس سایہ ڈال رکھا تھا؛ یہ وہ دور تھا جب آزادی اور انسانیت کے لیے آواز بلند کرنا جرم تھا اور ظالم حکمرانوں کے کارندے صدائے حق کو خاموش کرنے کے لیے گلے کاٹ دیتے تھے۔
انہوں نے مزید کہا کہ انقلابِ اسلامی سے پہلے فاسق حکومت نے شہوت، گناہ اور بدکاری کو عام کردیا تھا، تاکہ نوجوانوں کو عزت، حب الوطنی اور ظلم کے خلاف جدوجہد سے دور رکھا جائے، لیکن انہی ظلم و ستم کے سائے میں کچھ غیرتمند اور حریت پسند نوجوان، جو اپنی سرزمین کی آزادی کے خواب دیکھ رہے تھے، میدان میں اترے اور اپنی جانوں کو ہتھیلی پر رکھ کر دشمن کے ٹینکوں، سنگینوں، پروپیگنڈوں اور سازشوں کے سامنے سیسہ پلائی ہوئی دیوار بن گئے؛ جوانوں نے غلامی، آمریت اور استبداد کے خاتمے، قوم کی عزت و وقار کی بحالی اور اسلام کی سربلندی کے لیے اپنی جانوں کا نذرانہ پیش کیا۔
انہوں نے مزید کہا کہ یہ وہی شہداء تھے، جنہوں نے بد ترین حکمران کے خلاف قیام کیا، ان جوانوں نے ایسے وقت میں قربانیاں دیں، جب مغربی اسلحے سے لیس آمرانہ حکومت، روزانہ درجنوں بے گناہ جوانوں کو خاک و خون میں نہلا رہی تھی یا انہیں قید کر رہی تھی؛ انقلابِ اسلامی سے قبل، شہداء کے جنازوں تک اٹھانے اور ان کے غمزدہ خاندانوں کو تعزیتی اجتماعات تک منعقد کرنے کی اجازت نہیں تھی۔
انہوں نے انقلابِ اسلامی کو شہداء کے مرہون منّت قرار دیتے ہوئے کہا کہ شہداء کے مقدس خون کی بدولت 22 بہمن کا دن آیا، جب مظلوموں کی نصرت کا سورج طلوع ہوا اور ایک مردِ خدا اور ایک الٰہی رہنما کی قیادت میں قوم نے استبداد اور استعمار کے شکنجے کو توڑ دیا؛ یہ وہ دن تھا جب ہمارے شہداء کی قربانیاں رنگ لائیں؛ ہمارے زخمی دلوں کو سکون ملا اور غمزدہ والدین کی اشکبار آنکھوں کو قرار آیا۔
آپ کا تبصرہ