حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے 9 ذی الحجہ یوم عرفہ اور حضرت مسلم بن عقیل علیہ السلام کی شہادت کے موقع پر اپنے پیغام میں کہا: روز عرفہ توبہ و استغفارکا دن ہے۔ اس دن خدا تعالی نے اپنے بندوں کو عبادت و اطاعت کی دعوت دی ہے۔
انہوں نے مزید کہا: حضرت مسلم بن عقیل علیہ السلام کو حجت خدا اور امام برحق کا نائب خاص ہونے کا شرف حاصل ہے اور انہوں نے اپنے رہبر و رہنما کے مطیع ہونے اور باطل کے سامنے ڈٹ کر کلمہ حق بلند کرنے کی اعلی مثال قائم کی۔ یہی نہیں بلکہ اس راہ میں اپنی اور فرزندان کی قربانی پیش کرکے اس امر کو بھی واضح اور روشن کیا کہ دین کی سربلندی کے لئے کسی قربانی سے دریغ نہیں کیا جاسکتا۔
علامہ ساجدنقوی نے کہا: حضرت مسلم بن عقیل علیہ السلام کی سیرت و کردار کا بغور جائزہ لینے سے یہ بات واضح ہوجاتی ہے کہ ایک فرض شناس انسان حمایت حق میں کہاں تک جاسکتا ہے ۔بنی ہاشم کے جرات و شجاعت کے عظیم سپوت اور جناب عقیل ابن ابی طالب کے فرزند جناب مسلم نے نواسہ پیغمبر اکرم صلی اللہ علیہ وآلہ وسلم اور امام عالی مقام حضرت امام حسین علیہ السلام کے نمائندہ کی حیثیت سے کوفہ کا سفر اختیار کیا اور مسند شہادت پر فائز ہوئے۔
انہوں نے مزید کہا: اہل کوفہ کی جانب سے مسلسل خطوط کے ذریعہ نواسہ پیغمبر امام عالی مقام علیہ السلام کی بیعت پر آمادگی کے لئے انہیں دعوت دی گئی۔ جس کے جواب میں امام علیہ السلام نے کوفہ کے حالات کے جائزہ کے لئے حضرت مسلم بن عقیل علیہ السلام کو اپنا نمائندہ مقرر کرکے کوفہ کی جانب روانہ کرنا بھی جناب مسلم بن عقیل کی قدر و منزلت اور مقام و مرتبے کو واضح کرتا ہے۔
قائد ملت جعفریہ پاکستان نے کہا: یوم عرفہ کی اہمیت و افادیت کے پیش نظر اطاعت خداوندی کے جذبے سے سرشا ر ہوکر اپنی دنیوی و اخروی نجات کا سامان فراہم کرنے کی سعی و کوشش کی جاسکتی ہے۔ اس ضمن میں امام زین العابدین ؑ کی معروف روایت ہے کہ "آپ نے (اس دن) ایک شخص کی آواز سنی جو لوگوں سے مانگ رہا ہے تو فرمایا: وائے ہو تم پر آج بھی تم لوگوں سے سوال کررہے ہو جبکہ خالق کائنات سے امید ہے کہ آج ماں کے شکم میں موجود بچے کو بھی محروم نہیں رکھے گا"۔
انہوں نے کہا: کتب میں تفصیل کے ساتھ یوم عرفہ کے اعمال مذکور ہیں جیسے روزہ، غسل، زیارت امام حسین علیہ السلام پڑھنا۔ سید الشہداء علیہ السلام کی دعائے عرفہ کے یہ جملے "اے وہ جس نے اپنی ذات کو بلندی اور برتری کے لیے خاص کیا، جس کے دوست اس کی عزت سے عزت پاتے ہیں، اے وہ جس کے دربار میں بادشاہوں نے اپنی گردنوں میں عاجزی کا طوق پہنا"، پروردگار عالم کی عظمت و بزرگی کا خوبصورت بیان ہیں۔
آپ کا تبصرہ