حوزه نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے 18 ذی الحجہ "روز غدیر" کی مناسبت سے عالم اسلام کو مبارکباد پیش کرتے ہوئے کہا: یوم غدیر تکمیل دین اور نظام امامت و ولایت کے اعلان کے حوالے سے تاریخ اسلام میں بے پناہ اہمیت رکھتا ہے۔ یہ خاتم النبین صلی اللہ علیہ وآلہ وسلم کے بعد سلسلہ نبوت و رسالت کے خاتمے اور امامت و ولایت کے آغاز کے ٹائم فریم کی نشاندہی ہے۔
انہوں نے کہا: جس دینِ کامل کو خدا کے نزدیک پسندیدہ ترین دین قرار دیا گیا ہو اور جس کی ترویج و اشاعت کے لئے رحمت اللعالمین صلی اللہ علیہ وآلہ وسلم کے جیسی ہستی نے تکالیف اور مصائب برداشت کئے ہوں، حج بیت اللہ کے بعد غدیر جیسے تاریخی میدان میں اس کی تکمیل کازبان وحی سے اعلان غیر معمولی اہمیت کا حامل ہے اورعالم انسانیت کو اس جانب متوجہ کرتا ہے کہ جلد یا بدیر بالاخر دنیائے عالم کو دین کی جانب ہی رخ کرنا پڑے گا۔
علامہ ساجد نقوی نے کہا: رسول اکرم صلی اللہ علیہ وآلہ وسلم کے اعلان سے واضح ہوا کہ جس معنی میں پیغمبر صلی اللہ علیہ وآلہ وسلم مولا ہیں اسی معنی میں علی مولا ہیں۔ اس کی روشنی میں تمام پر لازم ہے کہ اسلام کی حفاظت، تشریح، ترویج اور نفاذ کا مرجع، مرکز، محور، امام اورجانشین پیغمبر (ص) علی ابن ابی طالب کو تسلیم کریں ، ان کی اطاعت کریں اور تطہیر نظام و معاشرہ کیلئے ان کے بھر پور عملی اقدامات میں ان کا ساتھ دیں۔آپ نے تطہیر نظام و معاشرہ کے لئے عدل و انصاف' اعتدال' توازن' حقوق کے حصول اور اسلامی نظام حیات کے نفاذ کے لئے جامع اصلاحات کیلئے بھرپور عملی اقدامات اٹھائے، آپ کے اندر ذاتی اور اجتماعی رہنمائی کے لئے تمام خصوصیات اور شرائط موجود تھیں جن میں ایک عام انسان سے لے کر دنیا پر حکمرانی کرنے کے خواہشمندوں کے لئے مکمل استفادے کا سامان موجود تھا اور آپ کی سیرت و کردار اور عمل اس کا منہ بولتا ثبوت ہے۔
قائد ملت جعفریہ نے کہا: یوم غدیر کی بابرکت ساعتوں میں ہمیں اس عہد کی تجدید کرنا ہوگی کہ دین کی سربلندی اور ترویج اور امام اوّل حضرت علی ابن ابی طالب علیہما السلام کے سیرت و کردار کو نمونہ عمل بناتے ہوئے اپنی انفرادی اور اجتماعی زندگیوں کو اس کے مطابق ڈھالیں گے اور یوم غدیر کی بابرکت موقع پر اسلامی مملکت ایران کی کامیابی اور صہیونی شر کے خاتمے کیلئے دعا گو ہیں۔
آپ کا تبصرہ