حوزہ نیوز ایجنسی کے مطابق، شیعہ علماء کونسل پاکستان کے اس وفد میں شیعہ علماء کونسل پاکستان کے مرکزی نائب صدر کے ہمراہ مولانا فرحت عباس جوادی، مولانا محمد رضا، مولانا محمد علی نقوی، مولانا عبد المجید، سید نیر عباس، سید محمود نقوی اور دیگر احباب موجود تھے۔
علامہ عارف حسین واحدی نے عظیم الشان علم و ذوالجناح کے جلوس سے خطاب کرتے ہوئے قائد محترم کی طرف سے پوری دنیا خاص کر پاکستان کے بہادر اور مخلص عزاداروں، علماء کرام، خطباء حضرات، ذاکرین عظام، بانیان عزا، ماتمیوں، نوحہ خوانوں، سبیلیں لگانے والوں، تعزیہ داروں اور انتظامات کرنے والوں کا شکریہ ادا کیا اور کہا: اے حسینیو! ہم یزیدی ظلم و جبر کے خلاف آپ کے احتجاج، عزاداری اور مسلسل جدوجہد کو سلام پیش کرتے ہیں۔ یہ عزاداری ہے جس نے ہر دور میں ظالم سے نفرت اور مظلوم سے ہمدردی کا درس دیا ہے۔
انہوں نے مزید کہا: بین الاقوامی سطح پر یہ عزاداری کسی کے لئے کسی قسم کی پریشانی کا سبب نہیں ہے بلکہ یہ ثابت ہو چکا ہے کہ عزاداری نے آج کے جبر میں پسے ہوئے معاشروں کو عزت،حریت،استقامت اور بہادری کے ساتھ زندہ رہنے کے گر سکھائے ہیں۔ آپ کی اس ولولہ انگیز عزاداری نے مظلومین اور مستضعفین میں بیداری کہ لہر پیدا کی ہے۔ آپ کی عزاداری سے آج کے دور کا ہر ظالم و جابر پریشان ہے، آپ کی عزاداری سے دشمنانِ اسلام یزیدی قوتیں پریشان ہیں، آپ کی عزاداری نے حسینی روح اور تڑپ کو جوانوں کے سینوں میں بھر دیا ہے۔ اس لیے ناپاک یزیدی روح آپ کی عزاداری سے پریشان ہے اور عزاداری سے گھبراتے ہوئے عزاداری کے راستے میں رکاوٹیں ڈالنے کی مذموم کوششیں کرتے ہیں، آپ کی عزاداری نے مظلوم اقوام کے دلوں میں سامراجی شیطانی طاقتوں کا رعب اور خوف دور کر دیا ہے جس سے وہ عزاداری سے خائف ہیں۔
علامہ عارف واحدی نے کہا: عزاداری یزیدی کردار کے مقابلے میں حسینی کردار اور راستے سکھاتی ہے، عزاداری مظلوم کربلا حسین ابن علی علیہم السلام کی قربانی اور ان کے پیغام کو آگے بڑھانے کا نام ہے چونکہ حضرت خاتم النبیین و رحمۃ للعالمین حضرت محمد مصطفی صلی اللہ علیہ وآلہ وسلم نے فرمایا تھا کہ "حسین مجھ سے ہے اور میں حسین سے ہوں"۔پھر فرمایا "میرا حسین ہدایت کا چراغ اور نجات کے کشتی ہے"۔ تو گویا عزادار پیغمبر گرامی اسلام صلی اللہ علیہ وآلہ وسلم کے اس خوبصورت پیغام کو لے کر آگے بڑھ رہے ہیں۔ عزاداری اسلام کے احیا کی اسی تحریک کو آگے بڑھانے کا مقدس نام ہے جو نواسۂ رسول نے کربلا سے شروع کی تھی۔ عزاداری نے ہی امریکہ کی سربراہی میں منحوس تکون کو ذلت آمیز شکست سے دوچار کیا، عزاداری ہماری شہ رگ حیات، ہماری روحِ عبادت اور ہمارا ایمان ہے۔
آپ کا تبصرہ