حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی کی جانب سے نمائندہ وفد شیعہ علماء کونسل پاکستان کے مرکزی نائب صدر علامہ عارف حسین واحدی کی سربراہی میں صدر شیعہ علماء کونسل وفاقی علاقہ اسلام آباد سید جاوید حسین شاہ، جنرل سیکرٹری وفاقی علاقہ اسلام آباد تصور عباس جاڑا، مولانا سید علی بنیامین نقوی، مولانا محمود یعسوبی نائب صدر، مولانا مہر فرحت حسین سکرٹری تبلیغات، مولانا راجہ اشفاق حسین، تراب علی بلتی ناظم جعفریہ یوتھ وفاقی علاقہ جات، صفت حسین سیکرٹری فنانس وفاقی علاقہ جات نے اسلام آباد G 6 ٹو کے مرکزی امام بارگاہ اثناء عشریہ سے برآمد ہونے والے مرکزی جلوس علم، ذوالجناح و تعزیہ کے جلوس میں شرکت کی۔
اس موقع پر نائب صدر شیعہ علما کونسل علامہ عارف حسین واحدی نے میڈیا سے گفتگو کرتے ہوئے کہا: محرم الحرام کے مرکزی جلوس ہائے عزا کا سلسلہ ملک بھر میں شروع ہو چکا ہے۔ یہ جلوس ہائے عزا امام عالی مقام علیہ السلام کے ساتھ اپنی دلی وابستگی کا اظہار ہے۔ اس کے ساتھ ساتھ یہ عزاداری محبت، وحدت المسلمین کے ساتھ ظلم کے ساتھ کھڑا ہونے کا درس دیتی ہے۔ اس وقت امریکہ و اسرائیل سمیت استعماری و سامراجی طاقتیں امت مسلمہ کے خلاف متحد ہو چکی ہیں۔ ہزاروں فلسطینی اس وقت تک شہید ہو چکے ہیں، حزب اللہ، انصار اللہ نے اسی تائید میں قربانیاں دیں۔ ایران پر اسرائیلی جارحیت کی شدید الفاظ میں مذمت کرتے ہیں۔ پاکستان اور ایران نے جارح ممالک کا غرور خاک میں ملایا ہے۔ ہم پاکستان کی افواج، حکومت و عوام کو سلام پیش کرتے ہیں جنہوں نے بھارت کا غرور خاک میں ملایا۔ پاکستان نے جس طرح ایران کی حمایت کی اس پر حکومت پاکستان کو سلام پیش کرتے ہیں۔ ہم ٹرمپ اور صہیونیوں کے مقابلے میں رہبر اسلامی آیت اللہ سید علی خامنہ ای کے ساتھ کھڑے ہیں۔
علامہ عارف حسین واحدی نے مزید کہا: عزاداری مظلوم کربلا کسی خاص مکتب یا مسلک کے خلاف نہیں بلکہ ہماری شہ رگ حیات ہے۔ تمام شیعہ سنی مل کر اپنے اپنے انداز میں فرزند رسول (ص) کا غم اور یاد مناتے ہیں۔
انہوں نے کہا: ہم اتحاد بین المسلمین کے داعی ہیں اور سفیر امن قائد ملت جعفریہ پاکستان علامہ سید ساجد علی نقوی کی سرپرستی و رہنمائی میں عزاداری کے تحفظ کیلئے میدان عمل میں موجود ہیں اور ہم ایک پرامن قوم اور اس ملک کے حقیقی وارث ہیں۔
شیعہ علماء کونسل پاکستان کے مرکزی نائب صدر نے کہا: محرم الحرام میں اتحاد و وحدت کی فضا کو قائم رکھنا ہماری اولین ترجیح ہے لیکن اسے ہماری کمزوری نہ سمجھا جائے ہم کبھی بھی اپنے جائز حقوق سے دستبردار نہیں ہو سکتے۔
انہوں نے کہا: سرکاری اہلکاروں کو فرزند رسول امام حسین علیہ السلام کا غم منانے والوں کے راستے میں بے جا رکاوٹیں کھڑی کرنے کے بجائے انہیں سہولیات فراہم کرنی چاہئیں جبکہ صوبہ سندھ اور صوبہ پنجاب کی حکومتیں امام حسین علیہ السلام کے نام پر لگائی جانے والی سبیلیں تک اکھاڑ رہی ہیں۔ اس گرمی کی شدت میں سبیلوں کو ختم کرنا انتہائی گھناؤنی حرکت ہے۔ جس پر ہم شدید احتجاج کرتے ہیں اور متنبہ کرتے ہیں کہ یہ یزیدی فعل ختم کرتے ہوئے سبیلوں کو ہٹانے کا سلسلہ فی الفور بند کیا جائے۔
علامہ عارف واحدی نے کہا: افسوس پنجاب میں صورتحال اچھی نہیں، اخبارات میں اچھے اشتہارات مگر زمینی حقائق اچھے نہیں۔ ہم پنجاب حکومت کو واضح کرتے ہیں کہ ہمیں ذکر حسین (ع) کے خلاف کوئی پابندی قبول نہیں۔ پنجاب میں پلاننگ کے تحت مجالس اور جلوسوں کے منتظمین کو گرفتار کرنے اور عزاداروں پر ایف آئی آرز کا اندراج کا سلسلہ گھناؤنی مہم کے انداز میں جاری ہے جس پر قائد ملت جعفریہ نے پنجاب حکومت پر سخت ناراضگی کا اظہار کیا ہے۔ یہ سراسر بنیادی جائز حقوق کی خلاف ورزی اور انتہائی شرمناک اقدام ہے۔
علامہ عارف واحدی نے دو ٹوک الفاظ میں اعلان کرتے ہوئے کہا: ہم عزاداری سید الشہداء علیہ السلام میں کسی قسم کی رکاوٹ یا قدغن قبول نہیں کریں گے خواہ اس کیلئے ہمیں کتنی بھی قربانی کیوں نہ دینا پڑے۔ ہم اپنے احتجاج کا حق محفوظ رکھتے ہیں جس کا ملک متحمل نہیں ہو گا۔
آپ کا تبصرہ