حوزہ نیوز ایجنسی کی رپورٹ کے مطابق، نجف اشرف سے موصولہ بیان کے مطابق آیت اللہ العظمٰی الحاج حافظ بشیر حسین النجفی نے مظلوم فلسطینی عوام، خصوصاً اہلِ غزہ کے خلاف جاری صہیونی مظالم پر شدید غم و غصے کا اظہار کیا ہے اور عالمی برادری کو اس مجرمانہ خاموشی پر تنقید کا نشانہ بنایا ہے۔
مرکزی دفتر کی جانب سے جاری کردہ بیان میں کہا گیا ہے کہ "ہم اب بھی انتہائی شدید درد کے ساتھ مظلوم اہلِ غزہ کے المیے کے تسلسل پر نظر رکھے ہوئے ہیں، جو غاصب، توسیع پسند، اور وحشی صیہونی ٹولے کی جانب سے جدید دور میں اقوام کے خلاف بدترین اقسام کے جرائم کے ارتکاب کے نتیجے میں پیدا ہوئی ہے۔
آیت اللہ العظمٰی بشیر نجفی نے اس بات پر شدید افسوس کا اظہار کیا کہ صہیونی مظالم کے نتیجے میں نہتے شہری، حتیٰ کہ بچے، عورتیں اور بوڑھے بھی محفوظ نہیں رہے۔ انہوں نے غزہ کے موجودہ حالات کو اس قدر ہولناک قرار دیا کہ جن کی منظر کشی الفاظ سے ممکن نہیں، خاص طور پر جب پیاس، بھوک اور بنیادی ضروریاتِ زندگی کی کمی کے ساتھ فلسطینی عوام کا محاصرہ کیا جا رہا ہے۔
مرجع تقلید نے اس بات پر بھی کڑی تنقید کی کہ وہ ممالک جو حیوان کے حقوق کی دہائی دیتے نہیں تھکتے، انسانی حقوق کے دعویدار ہونے کے باوجود، صہیونی مظالم پر مجرمانہ خاموشی اختیار کیے ہوئے ہیں۔ ان کا کہنا تھا کہ "چند شرمناک اور ناکافی کوششوں" کے سوا عالمی برادری نے اس سانحہ پر کوئی مؤثر اقدام نہیں کیا۔
مرکزی دفتر کی طرف سے جاری اپیل میں دنیا بھر کے ممالک، معزز شخصیات اور تمام حریت پسند انسانوں سے مطالبہ کیا گیا ہے کہ وہ اس مظلوم قوم کی فوری امداد کے لیے سنجیدہ اور عملی اقدامات کریں۔
آپ کا تبصرہ