حوزہ نیوز ایجنسی کی رپورٹ کے مطابق،آل جموں و کشمیر شیعہ ایسوسی ایشن (AJKSA) کے زیر اہتمام منعقدہ جلوسِ میلاد النبیؐ میں عقیدت و اتحاد کے ساتھ ہزاروں مرد، خواتین اور بچے شریک ہوئے۔ یہ جلوس امامیہ پارک سے شروع ہوکر امام باڑہ زڈیبل پر اختتام پذیر ہوا۔ علما، ذاکرین، مدرسوں کے طلبا و اساتذہ، رضاکار خواتین اور عام شہریوں کی بڑی تعداد نے شرکت کر کے رحمت و عدل کے پیغامِ رسول اکرمؐ سے وابستگی کا اظہار کیا۔
تقریب کا آغاز آج صبح 9:30 بجے امامیہ پارک میں ہوا، جہاں سید مظفر نے نبی کریمؐ کی سیرت اور عظیم کردار پر روشنی ڈالی۔ جلوس 10:30 بجے روانہ ہوا اور مختلف مقامات پر خطابات کیے گئے۔ عالمگیری بازار چوک پر ترجمان AJKSA سید طیّب رضوی نے نبی اکرمؐ کی سیرتِ طیبہ اور امام جعفر صادقؑ کی علمی خدمات پر گفتگو کی۔
ایم کے چوک ہوال میں شیخ محمد زکری نے صبر، حکمت اور اخلاق کے ذریعے اسلام کی توسیع پر روشنی ڈالی۔
علی پارک زادیبل میں سید عنایت رضوی نے امام جعفر صادقؑ کی فقہ، فلسفہ اور علومِ دینیہ میں رہنما حیثیت کو اجاگر کیا۔
جلوس کے اختتام پر امام باڑہ زادیبل میں سید غضنفر نے نعتیہ کلام اور نغماتِ عقیدت پیش کیے جبکہ فضا سبز جھنڈوں اور درود و سلام کی گونج سے معمور رہی۔
جلوس کے پرامن اور منظم انعقاد کے لئے آل جے کے شیعہ ایسوسی ایشن ضلع سرینگر کی کمیٹی نے اہم کردار ادا کیا۔
ضلعی صدر حاجی فردوس مرزا کی قیادت میں نائب صدر منشی بشیر، سیکریٹری یاسین مصطفی، جوائنٹ سیکریٹری نصیر سلطان، یوتھ کوآرڈینیٹر ارشد سلطان اور دیگر اراکین سرگرم رہے۔ مدارس کے اساتذہ و معائنہ کار اور طلبا نے بھی بھرپور شرکت کی جبکہ خواتین رضاکار ٹیم نے جلوس کی رہنمائی اور نظم و نسق میں نمایاں کردار ادا کیا۔
آل جے کے شیعہ ایسوسی ایشن کے صدر مولوی عمران رضا انصاری نے طلبا، اساتذہ، ذاکرین اور رضاکاروں کا شکریہ ادا کیا جن کی محنت سے یہ عظیم جلوس کامیاب ہوا۔
انہوں نے ضلعی انتظامیہ اور پولیس کا بھی شکریہ ادا کیا، جن میں ایس ایس پی سرینگر ڈاکٹر سندیپ چکروردی، ایس ڈی پی او زادیبل راشد، ایس ایچ او زادیبل وسیم گل، ایس پی ٹریفک سٹی ظہیر عباس اور ان کی ٹیمیں شامل ہیں۔ اس کے ساتھ ہی ایس ایم سی جوائنٹ کمشنر نزہت، جوائنٹ کمشنر سید ابو القاسم، وارڈ آفیسر ہلال اور صفائی عملے کی خدمات کو بھی سراہا۔
مولوی عمران رضا انصاری نے کہا کہ آج کا یہ عظیم اجتماع اس بات کا مظہر ہے کہ نبی کریمؐ کا پیغام آج بھی ہماری کمیونٹی کو جوڑتا ہے۔ ہم ان کی رحمت اور قیادت کو یاد کرتے ہیں اور امام جعفر صادقؑ کو خراج عقیدت پیش کرتے ہیں جنہوں نے علم و ہدایت کے چراغ کو آگے بڑھایا۔ ایسے اجتماعات ہمارے ایمان، علم اور خدمت کے عزم کو تازہ کرتے ہیں۔
آپ کا تبصرہ