حوزہ نیوز ایجنسی کی رپورٹ کے مطابق، دہلی/ اپنی نوعیت کے منفرد طرحی مسالمے کا انعقاد دہلی میں ’’بزمِ انوارِ سخن‘‘ کے زیرِ اہتمام کیا گیا۔ یہ سالانہ طرحی مسالمہ ہر سال دخترِ پیغمبر، بی بی فاطمہ زہرا سلام اللہ علیہا کی شان میں منعقد کیا جاتا ہے۔
انڈیا اسلامک کلچرل سینٹر میں ہونے والے اس مسالمے کی صدارت مولانا سید محسن جونپوری نے کی، جب کہ نظامت کے فرائض پروفیسر ناشر نقوی نے انجام دیے۔ اس ادبی نشست میں علما و شعرا کی ایک خوبصورت کہکشاں جلوہ گر تھی۔
اس موقع پر معروف شاعر علی انور زیدی کے مجموعۂ کلام ’’انوارِ سخن‘‘ کی رسمِ رونمائی بھی انجام پائی۔ مہمانِ خصوصی کے طور پر اعجاز فرخ حیدرآبادی شریک ہوئے، جب کہ سابق الیکشن کمشنر نسیم زیدی، انکم ٹیکس کمشنر ناصر علی رضوی اور ریٹائرڈ آئی پی ایس افسر قمر احمد زیدی نے مشترکہ طور پر ’’انوارِ سخن‘‘ کے پہلے ایڈیشن کا اجرا کیا۔
مولانا اطہر کاظمی (استاد منصبیہ عربی کالج، میرٹھ) نے اس سالانہ طرحی مسالمے کے حوالے سے صنفِ سلام کی تعریف، تاریخ اور اہمیت پر تفصیلی روشنی ڈالی۔ اسی طرح مولانا کاظم مہدی عروج جونپوری نے تحقیقی مقالے میں اردو شاعری کی اس اہم صنف کے تاریخی پس منظر پر گفتگو کرتے ہوئے کہا کہ ’’سلام‘‘ کی تاریخ اتنی ہی قدیم ہے جتنی اردو شاعری کی تاریخ۔ انہوں نے مزید کہا کہ آج کے دور میں ’’بزمِ انوارِ سخن‘‘ کا یہ طرحی مسالمہ تمام طرحی مسالموں میں اپنا منفرد مقام رکھتا ہے اور سلام کے حوالے سے دنیائے ادب کا سب سے بڑا سالانہ پروگرام بن چکا ہے۔
اعجاز فرخ حیدرآبادی نے اپنے خطاب میں کہا کہ یہ سالانہ محفل اپنی نوعیت کا ایک منفرد اجتماع ہے، جس کا اہتمام روایت کو برقرار رکھنے والے باشعور شعرا و شخصیات نے ذمہ داری کے ساتھ کیا ہے۔ انہوں نے کہا کہ مسالمے کے آغاز سے ہی اس بات کا خیال رکھا جاتا ہے کہ سلام کی صنف کے شایانِ شان کلام پیش کیا جائے۔
طرحی مشاعرے میں مولانا عباس ارشاد، مولانا دلکش غازی پوری، مولانا کاظم مہدی عروج، مولانا عابس کاظم جروالی، استاد جرار اکبرآبادی، شہزادہ گلریز رامپوری، سلیم امروہوی، پروفیسر عراق رضا زیدی، استاد سرور نواب، ابوالقاسم حیدرآبادی، ڈاکٹر ابوالقاسم، انجم صادق حیدرآبادی اور جان موانوی نے انیسؔ کے سلام کے مصرعے پر طرحی کلام پیش کیا۔
مزید برآں، مولانا رئیس جارچوی، مولانا فراز واسطی، مولانا غلام علی، مولانا طالب حسین، مولانا اظہار زیدی، مولانا باقر نقوی، مولانا نقی موانوی، اشجع رضا زیدی، جمال طحہٰ، کمال امروہوی، جمشید زیدی اور عدیل جان نے بھی خصوصی طور پر مسالمے میں شرکت کی۔
مرحوم شاعر علی انور زیدی کے مجموعۂ کلام ’’انوارِ سخن‘‘ کا یہ پہلا ایڈیشن ہے، جب کہ دوسرا ایڈیشن جلد ہی شائع کیا جائے گا۔
آپ کا تبصرہ