حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے 3 شعبان المعظم نواسۂ پیغمبر اکرم صلی اللہ علیہ وآلہ وسلم، محسنِ انسانیت حضرت امام حسین علیہ السلام کی ولادت باسعادت کے موقع پر جاری اپنے پیغام میں کہا: امام حسین ابن علی علیہ السلام کا یومِ ولادت انسانیت کیلئے مسرت و شادمانی کا دن ہے، یہ صرف ایک شخصیت کی ولادت نہیں بلکہ ایک نظریہ، ایک مکتب اور ایک قیام کی ولادت ہے، عالمِ انسانیت کیلئے ہادی، رہبر اور امام کی ولادت ہے ۔
انہوں نے مزید کہا: امام عالی مقام کی ذات گرامی جملہ اوصاف حمیدہ کی حامل ہے۔ آپ علیہ السلام کی سیرت کا ہر پہلو عالم انسانیت کی رشد و ہدایت کا سرچشمہ ہے کیونکہ آپ علیہ السلام نصِ قرآنی کے مطابق فرزند رسول صلی اللہ علیہ وآلہ وسلم ہیں اور آپ علیہ السلام کی حیات مبارکہ رسول معظم صلی اللہ علیہ وآلہ وسلم سے اکتساب کا فیض ہے اور جو زندگی سیرت رسول صلی اللہ علیہ وآلہ وسلم کا عین عکس اور مجسمہ ہو اس کا ہر فعل اور اقدام احکام الہی کے تابع ہوتا ہے۔
علامہ ساجد نقوی نے کہا: حضرت امام حسین علیہ السلام کے ساتھ پیغمبر اکرم صلی اللہ علیہ وآلہ وسلم کی محبت اور وابستگی احادیث مبارکہ سے بھرپور انداز میں عیاں ہوتی ہے۔ رسول خدا نے امام حسین علیہ السلام کو اپنا اور خود کو امام حسین علیہ السلام کا قرار دے کر عالم انسانیت پر واضح کر دیا کہ ان دونوں ہستیوں کا باہمی تعلق گہرا اور انتہائی راسخ ہے لہذا نبوت و ولایت کے پاکیزہ گھرانے میں پرورش پانے والی اس پاکیزہ ہستی کی سیرت و کمالات کا مطالعہ اور ان تعلیمات پر عمل پیرا ہونا ہی گناہ آلود معاشرے کو دینی اقدار اور جذبۂ حریت کے ذریعہ اسلام کے سانچے میں ڈھالنے کے لئے رہنمائی فراہم کرتا ہے۔
قائد ملت جعفریہ پاکستان نے امتِ مسلمہ پر زور دیا کہ وہ حضرت امام حسین علیہ السلام کے الہی، آفاقی اور مجاہدانہ کردار کو مشعل راہ بناتے ہوئے عالم اسلام کے مسائل کو حل کرے اور ظالم و جابر قوتوں کی مخالفت کرے اور کبھی بھی اپنے نظریات اور اصولوں سے دستبردار نہ ہو۔
آپ کا تبصرہ