حوزہ نیوز ایجنسی کی رپورٹ کے مطابق، آیت اللہ العظمیٰ جوادی آملی نے پیر کے روز صنعت کاروں اور مخیر حضرات کے ایک وفد سے ملاقات میں ان کی خدمات کو سراہتے ہوئے کہا کہ اللہ تعالیٰ کبھی غیبی مدد کے ذریعے اور کبھی عوام کی شرکت کے ذریعے اپنے دین کی مدد فرماتا ہے۔ انہوں نے کہا کہ کسی نے تصور بھی نہیں کیا تھا کہ لوگ کئی ماہ تک اسی جذبے کے ساتھ میدان میں موجود رہیں گے اور انقلاب و اسلام کی آواز بلند کریں گے۔ انہوں نے شہید رہبرِ انقلاب کی خدمات کو خراجِ عقیدت پیش کرتے ہوئے کہا کہ ان کی عظیم قربانی کے ساتھ عوام کے کردار کو بھی نظرانداز نہیں کیا جا سکتا۔
انہوں نے کہا کہ ایک وقت ایسا تھا جب ایران میں صہیونی حکومت کے خلاف مسلمانوں کی کامیابی کے لیے دعا کی مجلس بھی منعقد کرنا ممکن نہیں تھا، لیکن آج اسلامی انقلاب، عوام کی استقامت، شہداء کی قربانیوں اور اللہ پر توکل کی برکت سے امریکہ اور اسرائیل ایران کے سامنے بے بس اور ذلیل ہو چکے ہیں۔
آیت اللہ جوادی آملی نے کہا کہ انقلاب کے ابتدائی دنوں میں محدود وسائل کے باوجود مخلص افراد نے بغیر کسی دنیاوی لالچ کے ملک کی خدمت کی، لہٰذا آج بھی اسی جذبے کے ساتھ عوام کی خدمت کی جا سکتی ہے۔
انہوں نے آٹھ سالہ دفاعِ مقدس کا ذکر کرتے ہوئے کہا کہ اس جنگ میں کامیابی جدید ہتھیاروں سے نہیں بلکہ عوام کے ایمان، شجاعت اور قربانیوں کی بدولت حاصل ہوئی۔ انہوں نے کہا کہ ملک کی موجودہ عزت اور سلامتی انہی شہداء کی مرہونِ منت ہے جنہوں نے اسلام اور وطن کی حفاظت کے لیے اپنی جانیں قربان کیں۔
انہوں نے معاشرے میں محنت، پیداوار اور خدمت کے فروغ پر زور دیتے ہوئے کہا کہ غربت ایک بڑا سماجی مسئلہ ہے اور سب کی ذمہ داری ہے کہ ضرورت مندوں کی مدد، روزگار کے مواقع پیدا کرنے اور غربت کے خاتمے کے لیے عملی کوشش کریں۔ آخر میں انہوں نے خدمت گزاروں کو نصیحت کی کہ لوگوں کی باتوں سے دل برداشتہ نہ ہوں، ہمیشہ اللہ کی رضا کو سامنے رکھ کر عوام کی خدمت کرتے رہیں۔
آپ کا تبصرہ