حوزہ نیوز ایجنسی کی رپورٹ کے مطابق، ایران کے صوبہ ہرمزگان میں نمائندہ ولی فقیہ حجۃ الاسلام والمسلمین عبادی زادہ نے سیریک شہر میں رہائشی مکانات پر امریکی حملے کے بعد تعزیتی اور ہمدردی کا پیغام جاری کیا ہے۔ اس پیغام کا متن درج ذیل ہے:
بسم اللہ الرحمن الرحیم
سیریک شہر کے علاقے "کوہستک" میں ایک رہائشی مکان اور شادی کی تقریب پر امریکہ کے مجرمانہ حملے کی دردناک خبر، جس کے نتیجے میں ہمارے عزیز ہم وطنوں کی ایک تعداد، جن میں معصوم بچے اور خواتین بھی شامل ہیں، شہید اور بڑی تعداد میں مظلوم عوام زخمی ہوئے، ہمارے لیے گہرے رنج و غم کا باعث بنی۔
ایسے لوگوں کو خاک و خون میں نہلانا جو ایک خاندانی تقریب میں خوشی اور اپنی معمول کی زندگی کے ماحول میں موجود تھے، اس دشمن کی انسانیت سوز اور جارحانہ فطرت کا واضح مظہر ہے جو بچوں، خواتین اور عام شہریوں کی جان کی حرمت کا بھی پاس نہیں رکھتا۔ اس واقعے میں 16 سالہ نوجوان، چار سالہ بچے اور بے گناہ خواتین کی شہادت ہرمزگان کے معزز عوام اور پوری ایرانی قوم کے دل پر ایک گہرا زخم ہے۔
بلاشبہ ان مظلوم شہداء کا پاکیزہ خون ایرانی قوم کے خلاف امریکہ کے جرائم کا ایک اور ثبوت ہو گا اور اس طرح کی وحشیانہ کارروائیاں کبھی بھی عظیم ایرانی قوم کے عزم، عزت اور ملکی آزادی، سلامتی اور علاقائی سالمیت کے دفاع میں استقامت کو متزلزل نہیں کر سکتیں۔
میں صوبہ ہرمزگان کے معزز حکام، طبی اور امدادی اداروں سے مطالبہ کرتا ہوں کہ اپنی تمام تر صلاحیتوں کو بروئے کار لاتے ہوئے زخمیوں کے علاج اور اس سانحہ سے متاثرہ خاندانوں کی امداد کے عمل کو پوری سنجیدگی اور تیزی سے جاری رکھیں اور اس بات کو یقینی بنائیں کہ اس مشکل صورتحال میں کوئی بھی غم زدہ خاندان علاج، امداد اور کسی بھی حوالے سے کسی مشکل کا سامنا نہ کرے۔
محمد عبادی زادہ
صوبہ ہرمزگان میں نمائندہ ولی فقیہ اور امام جمعہ بندر عباس
آپ کا تبصرہ